OÉ-CUSSE, 24 outubru 2023 (TATOLI – Prezidente Sub-Komisaun Reguladora Arte Marsiál (Sub-KRAM) Rejiaun Administrativa Espesiál Oé-Cusse Ambeno (RAEOA), Jeferino da Cruz Salu, konfirma, ba uniforme hanesan farda no kalsa inklui atributu organizasaun arte-marsiál sira, sub-KRAM la- autoriza atu uza durante iha eleisaun suku.
“Atu tama eleisaun lideransa komunitáriu sira, ita fó-sai ona aviza kada organizasaun sira, proibidu atu uza sira-nia atributu partisipa iha eleisaun suku, ne’e KRAM la-autoriza, ita bandu totál, ita só autoriza bele kontinua treinu livre,” Jeferino da Cruz Salu, iha Oé-Cusse, segunda ne’e.
Notísia relevante: Ofisiál, Organizasaun IKS treina livre ona iha suku Costa
Tuir nia, kuandu iha eleisaun parlamentár liubá, KRAM hasai sirkulár ba organizasaun hotu atu-bele suspende atividade ezersisíu ka treinu, tanba iha partidu polítika sira movimentu ba mai hala’o kampaña.
“Maibé to’o agora ami seidauk hasai sirkulár, tanba ita haree, la’ós hanesan kampaña lalin masa ba mai, ita akompaña kandidatu xefe suku sira hala’o kampaña reál, tama bairru ida ba bairru seluk ne’ebé ha’u hanoin laiha problema, kona-bá impedimentu,” nia informa.
Tan ne’e, maka iha semana kotuk, iha informa ona, ba responsavél organizasaun sira hotu, ne’ebé eziste iha Oé-Cusse, katak bele kontinua treinu maibé labele uza atributu iha eleisaun xefe suku.
“Ida-ne’e KRAM la fó autorizasaun ba ema ida ba organizasaun ida, atu apoia kandidatu ida, maibé direitu demokrátiku kada sidadaun, ba treinu bele kontinua, tanba ida-ne’e laiha impedimentu ba iha prosesu eleisaun suku, maibé KRAM la fó autorizasaun atu uza atributu organizasaun partisipa iha eleisaun suku,” nia fó-hanoin.
Nia informa, bainhira akontese impedimentu ka krime ruma iha eleisaun suku, iha parte seguránsa sira hanesan PNTL ho F-FDTL sei atua tuir orden ne’ebé iha.
Entretantu, tuir dadus ne’ebé sub-KRAM Oé-Cusse rejista, hamutuk organizasaun hitu (7) maka ejiste iha Oé-Cusse ho totál membru hamutuk 1.800-resin, komposta hosi Organizasaun Persaudaraan Setia Hati Terate (PSHT), organizasaun Ikatan Kera Sakti (IKS), organizasaun Kmanek Oan Rai-klaran (KORKA), organizasaun Perisai Diri (PD), THS-THM, Karate, Boxin, no Taek-wondo.
Notísia relevante: KRAM Oé-Cusse suspende ezersísiu arte-marsiál durante períodu kampaña eleitorál
Jornalista: Abílio Elo Nini
Editor: Rafael Ximenes de A. Belo
