OÉ-CUSSE, 24 outubru 2023 (TATOLI – Sub-Komisaun Reguladóra Arte Marsiál (Sub-KRAM) Rejiaun Administrativa Espesiál Oé-Cusse Ambeno (RAEOA), segunda ne’e reativa sub–ranting organizasaun Ikatan Kerasakti (IKS) iha bairru Numbei suku Costa sub-rejiaun Pante Makasar hodi bele treina livre.
Notísia relevante: Governu ofisialmente halo reabertura ezersísiu arte-marsiál tolu iha Timor-Leste
Prezidente sub-KRAM Oé-Cusse, Jeferino da Cruz Salu, apela ba Organizasaun IKS, atu hala’o prátika treina livre, presiza kumpri lei no orden Estadu nian, katak envolve iha organizasuan arte-marsiál persiza integra ba komunidade hodi enkuadra ba desportu.
“Liafuan rua de’it, integra ba komunidade no enkuadra ba desportu, ita hosi komunidade katak ita ne’e mesak timor-oan de’it, ita organiza aan iha organizasaun ida, hanesan PD, Karate, KORKA, PSHT no seluk-tán, ita organiza an iha ne’ebé maibé objetivu mak ne’e enkudra-an ba desportu,” Jeferinu da Cruz Salu fó-hanoin.
Nia fundamenta, organizasaun arte-marsiál nu’udar organizasaun desportiva, tanba bazeia lei, organizasaun hirak-ne’ebé eziste iha Timor-Leste, hanesan iha lei númeru 10/2008, revogasaun ba lei númeru 5/2017, iha revogasaun ne’e, nu’udar segundu diretivu KRAM, hodi hala’o nia funsionamentu no ezekusaun atu-bele organiza.
“Tan ne’e kritéria atu sai treinadór, primeiru tenki iha sertifikadu no submete naran mai iha sub-KRAM, membru sira tenki iha uniforme no fatin treinamentu tenki klaru no labele iha disputa kona-bá fatin liu-liu estatutu rai,” nia informa.
Notísia relevante: KRAM halo re-ajustamentu ba estrutura organizasaun arte marsiál iha RAEOA
Xefe Departementu Juventude Desppoertu no Kultura Oé-Cusse Vitór Manuel Neno, fó ba organizasaun IKS, treinu livre ne’e la’ós realiza konforme hakarak implementa ho regra hodi submete oráriu ba sub-KRAM no PNTL, nune’e bele hetan seguransa.
“Imi treinu iha ne’e, presiza hatama oráriu iha Sub-KRA no PNTL, imi treinu iha ne’e semana ida treinu dalahira no oras komesa, nune’e bele hetan seguransa, xefe aldeia, bairru no katekista, sira-ne’e membru seguransa iha ne’e, nune’e ba futuru bairu liu-liu merkadu Numbei atu sai asegura, kada organizasaun koloka ema na’in-rua bele fasilita seguransa ba komunidade sira tanba treinu atu asegura la’ós halo komunidade kalan toba la dukur,”
Xefe bairru Numbei, Lorensu Liub, agradese tanba iha antes ne’e, autoridade lokál sira hato’o ona proposta hodi ativa iha bairru Numbei.
“Tanba durante ne’e, ita rona no haree problema akontese iha bairru ida-ne’e, tan ne’e, iha mumentu ne’ebá ami sujere ba Sub-KRAM no polísia eskuadra Pante Makasar, loke fatin ida iha Numbei. Ami agradese tanba ohin loron ita realiza duni, joven sei sei la’o tuir mensajen ne’ebé ohin hato’o ona, hanesan buka’e ida ba moris lor-loron nian, nune’e ita-nia hahalok di’ak, ita-bele bele lori Oé-Cusse ba moris di’ak,” nia katak.
Entretantu, totál membru arte-marsiál IKS iha bairru Numbei hamutuk na’in-175 ho prátikante sira kuaze na’in-50.
Notísia relevante:Governu legaliza grupu arte marsiál tolu
Jornalista: Abílio Elo Nini
Editor: Rafael Ximenes de A. Belo
