iklan

MUNISÍPIU, VIQUEQUE

PNDS menus rekursu kontrola reabilitasaun sede suku Caraubalu Viqueque

PNDS menus rekursu kontrola reabilitasaun sede suku Caraubalu Viqueque

Edifísiu sede suku Caraubalu, Viqueque. Imajen Tatoli/Vitorino Lopes da Costa

VIQUEQUE, 24 outubru 2023 (TATOLI)Xefe suku Caraubalu, postu Viqueque Vila, munisípiu Viqueque, João Pinto, hateten, Programa Nasionál Dezenvolvimentu Suku (PNDS) menus rekursu tékniku nune’e difikulta serbisu kontrolu reabilitasaun sede suku.

“Reabilitasaun sede suku Caraubalu daudaun ne’e atinje ona 90%, maibé hasoru dezafiu tanba foin lalais Governu hapara kontratu tékniku PNDS, nune’e rekursu menus difikulta serbisu. Ami mós limitadu Ekipa Jestaun Suku (EJS) ba kontrolu atividade konstrusaun sira,” nia relata, iha nia knaar fatin, kuarta ne’e.

Notísia relevante : PNDS Viqueque menus forsa traballu kontrola programa

Governu liuhosi PNDS foin lalais loke fali ona vaga hodi rekruta rekursu hodi bele apoia implementasaun programa sira.

“Espera bele aselera lalais prosesu rekrutamentu ida-ne’e. Tanba foin lalais Governu alerta katak to’o fulan dezembru implementasaun programa tenke ramata, entaun ami mós tenke aselera. Ita-nia osan tama hela de’it, maibé prosesu implementasaun tarde,” nia akresenta.

Reabilitasaun sede suku Caraubalu, hamutuk ho saneamentu ida, aumenta metru tolu sede suku anteriór ne’ebé ho medida metru 6×6 sai metru 9×6.

“Ami sei esforsu finaliza serbisu lalais atu nune’e tama iha fulan-dezembru reabilitasaun sede suku bele konklui,” nia tenik.

Jornalista     : Vitorino Lopes da Costa
Editora          : Julia Chatarina

iklan
iklan

Leave a Reply

iklan
error: Content is protected !!