DILI, 25 outubru 2023 (TATOLI) – Gabinete jurídiku Ministériu Edukasaun (ME) divulga dekretu-lei haat ba dirijente ministériu nian atu iha koñesimentu ba lei refere.
Dekretu-lei haat ne’e mak n.u 32/2023, 31 maiu, kona-ba Rejime Jurídiku ba Sistema Nasionál iha Ensinu Báziku, n.u 33/2023, 31 maiu, kona-ba Rejime Jurídiku ba Sistema Nasionál ba Ensinu Sekundáriu, n.u 34/2023, 31 maiu kona-ba Aprovasaun Rejime Jurídiku ba Sistema Nasionál ba Edukasaun Pré-Eskolár no Programa Edukasaun Infantíl.
Dekretu-lei seluk mak n.u 31/2023, 31 maiu, kona-ba alterasaun dahuluk ba dekretu-lei n.u 23/2010, 9 dezembru, ne’ebé ko’alia kona-ba estatutu karreira edukadór infánsia no profesór ba ensinu báziku no sekundáriu (estatutu karreira dosente).
Kona-ba alterasaun Estatutu Karreira Edukadór sira ne’e aprova iha 08 marsu 2023 iha Konsellu Ministru ho objetivu atu hametin valorizasaun karreira liuhosi sistema regulár sira atu halo verifikasaun ka aferisaun bá kompeténsia sira no prevee mekanizmu formasaun no avaliasaun dezempeñu nian ne’ebé bele garante kualidade sistema edukasaun no ensinu nian.
Notísia relevante: Governu aprova estatutu karreira edukadór husi Ensinu Pré-eskolár to’o Sekundáriu
Sekretáriu Estadu Edukasaun, Ensinu Sekundáriu no Eskola Téknika, Domingos Lopes Lemos, dehan divulgasaun lei haat ne’e ba diretór-jerál, diretór nasionál no inspetór sira, tambá lei ne’e hetan ona aprovasaun iha Governu anteriór, maibé seidauk halo deseminasaun. Tanba ne’e, Ezekutivu atuál tau importante ba asuntu ne’e molok divulga fali ba diretór munisipál sira.
Diretór-Jerál Edukasaun Ensinu ME, Deolindo da Costa, salienta katak antes divulga ba munisípiu no nivel eskolaridade sira, dirijente iha nasionál bele informadu ona, nune’e bainhira ekipa sira tun ona sira bele reforsa serbisu ne’e ho di’ak liután.
Jornalista: Tomé Amado
Editora: Maria Auxiliadora
