DILI, 26 outubru 2023 (TATOLI)—Bankada opozisaun FRETILIN iha Parlamentu Nasionál (PN) husu atu halo debate ho Governu kona-ba espekulasaun presu foos iha merkadu rai-laran.
Notísia Relevante: Governu lansa intervensaun merkadu ho foos lokál tonelada 2.300
Sekretária Meza Parlamentu Nasionál, Deputada Virgínia Ana Belo, hateten pedidu bankada FRETILIN nian ne’e reuniaun líder bankada parlamentár ohin deside tau ona ajenda hodi bele hala’o debate ho Governu iha 07 novembru 2023.
“Rekerimentu ida ba realizasaun ba interpelasaun ho Governu hosi bankada opozisaun FRETILIN liga ba espekulasaun presu foos iha merkadu. Interpelasaun ka diskusaun ho Governu sei hala’o iha 07 novembru hodi haree Governu nia prosesu atendimentu to’o iha ne’ebé,” Sekretária Meza PN ne’e hateten ba jornalista sira hafoin reuniaun líder bankada iha uma fukun PN, kinta ne’e.
Liuhosi debate ne’e, husu oinsá Governu nia atuasaun ba iha folin foos iha merkadu ne’ebé iha espekulasaun presu, mezmu iha iha intervensaun sira hosi Governu.
“Sira hakarak hatene, tanbasá iha espekulasaun presu loza sira hasa’e presu foos nian deskontrolizadu,” nia dehan.
Sekretária Meza PN ne’e dehan, mezmu agora daudaun lae ona presu komesa normál ona, mezmu seidauk ba loza hotu-hotu maibé iha fatin barak hanesan marka balun hosi kompañia importadór foos hanesan PERISOS ninian ne’e komesa normaliza tuir saida mak dekretu Governu fó sai.
Notísia Relevante: PN kontinua preokupa folin foos iha merkadu
Jornalista : Nelson de Sousa
Editór : Cancio Ximenes
