DILI, 26 outubru 2023 (TATOLI)–Prezidente Japan International Cooperation Agency (JICA), Tanaka Akihiko, kinta ne’e, hasoru malu ho Primeiru-Ministru, Kay Rala Xanana Gusmão, hodi ko’alia kona-ba apoia sira.
“Sorumutu ida-ne’e di’ak tebes. Ha’u hetan oportunidade di’ak atu rona Primeiru-Ministru, ami konfirma ami-nia apoia hodi kontinua relasaun entre nasaun rua hosi fuan ba fuan,” Tanaka Akihiko hateten hafoin hasoru Xanana, iha Gabinete Fronteira Marrítima, Palásiu Governu, kinta ne’e.
Nia dehan, país rua iha amizade di’ak tebes hodi dezenvolve Timor-Leste, nune’e kontinua serbisu hamutuk.
“Ha’u esplika ba Primeiru-Ministru katak JICA kompromete atu kontinua esforsu kolaborasaun ne’e ba dezenvolvimentu nasaun no tuir estratéjia Governu no lideransa Primeiru-Ministru nian,” nia akresenta.
Notísia relevante : JICA sei halo estudu idrográfika iha Oé-Cusse atu dezenvolve portu Mahata
Tanaka Akihiro salienta, JICA iha projetu barak seidauk finaliza no sei kontinua to’o finaliza. Nune’e, iha tinan oin (2024) disponível koordena di’ak liután ho Governu ba nesesidade Timor nian.
“Atu dehan ami susesu tebes apoia Timor-Leste iha área kapasitasaun rekursu umanu, ba ida-ne’e ami hakarak atu programa ne’e kontinua,” nia kompromete.
Japaun liuhosi JICA durante ne’e apoia Timor-Leste iha dezenvolvimentu infraestrutura, ne’ebé presiza tebes atu serbisu hamutuk di’ak liután iha área ne’e.
“Ha’u hatene katak Govenru sei iha prosesu hodi hodi haree ninia prioridade sira no ami hakarak kontinua projetu sira liu-liu liga ho prioridade Governu,” nia tenik.
Biban hanesan, Primeiru-Ministru, Xanana Gusmão apresia no agradese ba apoia sira ne’ebé JICA fó durante ne’e.
“Prezidente JICA iha Tokyo mai hasoru ha’u, ita hotu hatene katak JICA ajuda ita uluk kedas to’o agora, sira ajuda iha buat barak, ne’e duni sira mai para ami ko’alia ba malu hodi hatene saida maka karik ita presiza iha tinan mai ne’e, sira mai haree ida ne’ebé sira bele ajuda. Ita apresia tebes ba Japaun tanba sira mai halo buat barak iha ne’e,” Xanana subliña.
Iha hasoru malu ne’e, Primeiru-Ministru akompaña hosi Ministru Negósiu Estranjeiru no Kooperasaun, Bendito Freitas, enkuantu Prezidente JICA, Tanaka Akihiko akompaña hosi Embaixadór Japaun iha Timor-Leste, Tetsuya Kimura.
Jornalista : Antónia Gusmão
Editora : Julia Chatarina
