OÉ-CUSSE, 26 outubru 2023 (TATOLI – Komandante Polísia Nasionál Timor-Leste (PNTL), RAEOA, Superintendente Polísia, Nicolau Franselino da Costa, informa, daudaun ne’e ekipa konjunta prepara ona estratéjia atu asegura eleisaun suku ne’ebé sei realiza iha loron sábadu 28 outubru 2023 ne’e la’o ho susesu.
Tuir komandante ne’e katak, ekipa konjunta ne’e komposta hosi Forsa-Defeza Timor-Leste (F-FDTL), Batallaun Ordén Públika (BOP), Polísia Unidade Marrítima (UPM) no Polísia Unidade Fronteira (UPF), ne’ebé garante sei la’o ho susesu.
“Ohin komandu PNTL konvoka reuniaun ho forsa destakadu sira, komposta hosi F-FDTL, BOP, UPM no UPF, ami halo enkontru preparasaun atu responsande ba eleisaun lideránsa komunitáriu ne’ebé sei hala’o iha sábadu semana ne’e, ohin ami diskute pontu rua, kona-bá prevensaun no atuasaun,” Nicolau Franselino da Costa, ba jornalista sira hafoin remata enkontru ho ekipa konjunta iha komandu PNTL Oé-Cusse, kinta ne’e.
Notísia relevante: PNTL Oé-Cusse la tolera grupu-individu prátika krime iha sentru votasaun
Autoridade polisiál ne’e informa, prevensaun maka daudaun ne’e ekipa konjunta realiza enkontru, no kontinua hala’o sofors, haleu Oé-Cusse, hosi fronteira Sakatu suku Nipani, mai fali liuhosi suku Costa, Lalisuk to’o suku Cunha eis-merkadu Tono no kontinua ba ponte Noefefan suku Lifau.
“Ida-ne’e atu hatudu ba povu Oé-Cusse katak, komandu RAEOA hamutuk ho forsa destakadu no ekipa tomak, preparadu no prontu atu responde kuaker problema saida de’it maka akontese,” nia promete.
Kona-bá, atuasaun bainhira sidadaun balun tenta halo krime hodi instabiliza situasaun iha ámbitu eleisaun suku, maka ne’e, ekipa preparadu atu atua, karik mosu kazu krime ruma iha terrenu, sei halo prosesu normál tuir lei ne’ebé vigora ona.
“Tan ne’e maka planu ne’ebé iha, kada sentru votasaun ita sei koloka membru na’in-rua, maibé la’ós na’in-rua de’it ne’e maka hala’o servisu iha ne’ebá, sei hetan apoia hosi F-FDTL tanba sei hala’o kontrolu ba fatin hotu iha territóriu Oé-Cusse,” nia hateten.
Dirijénte PNTL Oé-Cusse, apela ba komunidade sira iha territóriu Oé-Cusse atu kontribui pás no estabilidade durante eleisaun implementa iha kada suku no aldeia.
“Ba komunidade iha territóriu RAEOA, sub-rejiaun haat liu-liu ba suku 18 no aldeia 63 katak, husu ba ita hotu atu kontribui ba pás tanba festa ne’e ba lideránsa komunitáriu, importante liu ba povu tomak iha territóriu nasionál espesiálmente iha Oé-Cusse,”
Notísia relevante:PNTL Oé-Cusse menus rekursu umanu
Jornalista: Abílio Elo Nini
Editór: Rafael Ximenes de A. Belo
