OÉ-CUSSE, 26 outubru 2023 (TATOLI – Diresaun Rejionál Edukasaun Rejiaun Administrativa Espsiál Oé-Cusse Ambeno Ambeno (RAEOA), daudaun ne’e identifika ona profesór na’in-121 mai hosi ensinu báziku primeiru, segundu no terseiru siklu, hodi kompleta formasaun akadémika ho grau baxarelatu hosi Institutu Nasionál Formasaun Dosente Profisonál Edukasaun (INFORDEPE).
Notísia relevante: Sentru formasaun profesór iha Pante Makasar inaugura ona
Sekretária Rejionál ba Asuntu Edukasaun no Solidariedade Sosiál, Abelina da Costa, formasaun ba profesór sira importante tebes, obrigatóriu ba ema hotu, ne’ebé hakna’ar-an hanesan manorin tenke fó formasaun.
“Entaun formasaun nível baxarelatu agora daudaun ita rejista ona profesór na’in-121 ne’ebé daudaun ne’e profisaun hanesan manorin maibé sira presiza tuir formasaun hodi bele hetan nível akadémika hosi INFORDEPE,” Abelina da Costa, ba Tatoli iha Oé-Cusse, kinta ne’e.
Ezekutiva ne’e, esplika, profesór hirak-ne’e sei hala’o kursu espesializada iha formasaun espesializada ba profesór durante tinan tolu. liuhosi kooperasaun UNTL ho Institutu Nasionál Formasaun Dosente no Profisionál Edukasaun (INFORDEPE).
Tuir nia, tanba tuir lei baze ba edukasaun ezije ema atu sai profesór mínimu grau akadémiku tenke baxarelatu no másimu lisensiatura.
“Agora formasaun ne’e sei hahú depois de finadu iha novembru, ita sei halo abertura ba fatin formasaun iha sentru formasaun profesór ne’ebé horsehik ita inaugural ona,” nia informa.
Notísia relevante: Profesór kontratadu 182 hosi RAEOA gradua ho títulu baxarelatu
Jornalista: Abílio Elo Nini
Editór: Rafael Ximenes de A. Belo
