OÉ-CUSSE, 25 outubru 2023 (TATOLI – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hamutuk ho Prezidente Institutu Nasionál Formasaun Dosente Profisionál Edukasaun Timor-Leste (INFORDEPE), Domingos Martins, kuarta ne’e, inaugura projetu sentru formasaun ba profesór sira iha sub-rejiaun Pante Makasar.
Notísia relevante: Xefe Estadu observa projetu sentru formasaun profesór iha Pante Makasar
Prezidente Augtoridade RAEOA, Arsénio Paixão Bano, hateten, sentru formasaun ne’e inportante ba RAEOA nu’udar investimentu ba setór edukasaun hodi hasa’e kualidade manorin-sira liuhosi kapasitasaun no formasaun iha nivél prosesu ensinu aprendizajen.
“Ita persiza duni sentru ida-ne’e ba RAEOA, tanba ita iha profesór besik 1000 sai manorin-na’in iha Oé-Cusse, ba Dili maske transporte di’ak ona, maibé ita presiza besik, tan ne’e ha’u husu INFORDEPE nia apoia ba setór edukasaun liu-liu ba profesór sira, para RAEOA iha longu prazu bele iha profesór kualifikadu atu-bele hanorin oan sira,” Arsénio Paixão Bano, ko’alia iha ámbitu inaugrasaun ne’e.
Tuir nia, estudante iha Oé-Cusse kuaze rihun 25 ona, labarik sira presiza hetan matenek barak, entaun Autoridade tenki kria kondisaun dignu ba manorin na’in-sira no estudante sira.
Prezidente INFORDEPE, Domingos Martins, agradese ba Autoridade RAEOA tanba ho esforsu no inisiátiva tomak, bele kria fatin formasaun ida hodi koresponde ba investimentu ba setór edukasaun iha Rejiaun Oé-Cusse Ambeno.
“Entaun ba futuru fatin mak ne’e ha’u hanoin fatin di’ak, ha;u husu ita hotu servisu edukasaun atu kuida fatin ida-ne’e hanesan ita-nia uma rasik, tanba fatin ida hanesan ne’e, bele halo fali iha tinan 20 mai tán, haree tanba ne’e perténsia ba ita-nian no perténse ba futuru jerasaun sira,” nia fó hanoin.
Nune’e mós, Sekretária Rejionál ba Asuntu Edukasaun no Solidariedade Sosiál, Abelina da Costa, informa, daudaun ne’e Diresaun Edukasaun prepara ona mobiliáriu hodi distribui ba sentru formasaun ne’e, atu prepara hahú formasaun iha 2024.
“Tan ne’e ohin loron ita hotu fó testamuña katak, ami hetan ona fatin uma formasaun ida-ne’ebé dignu kapa’as tebes, atu halo formasaun ba profesór sira, kadeira meja iha ona, iha sala tolu ami oferese ba fatin formasaun nian atu halo formasaun iha 2024,” nia tenik.
Notísia relevante: RAEOA lansa Sentru Formasaun Profesór nu’udar investimentu iha setór edukasaun
Entretantu, projetu ne’e ezekuta hosi kompañia Irmão Timor Unipesoál Lda, ho valór kontratu hamutuk rihun $374.755.81, osan ne’e Autoridade RAEOA prevee hosi Orsamentu Jerál Estadu (OJE) 2022 nian.
Purtantu, fasilidade ne’e konstrui iha sentru formasaun ne’e fatin formasaun sala neen (6) kompostu hosi sala ba komputadór, sala ba formasaun profesór, sala ba formadór sira, sala laboratóriu kona-bá prátika nian, sala ba formadór sira, no mós sala kantina ida no kompleta mós ho fasilidade seluk tan.
Jornalista: Abílio Elo Nini
Editór: Rafael Ximenes de A. Belo
