PNTL Oé-Cusse sei la fó espasu ba individu tenta instabiliza Eleisaun Suku
OÉ-CUSSE, 27 outubru 2023 (TATOLI – Komandante Polísia Nasionál Timor-Leste (PNTL), RAEOA, Superintendente Polísia, Nicolau Francelino da Costa, informa, parte seguransa sei la tolera no fó espasu ba grupu ka individu tenta prátika aktu krime hodi instabiliza eleisaun suku iha sentru votasaun sira iha territóriu Oé-Cusse.
Autoridade seguransa másimu iha Oé-Cusse, hato’o nia apelu ne’e iha ámbitu serimónia distribuisaun materiál sensitivu no la’ós sensitivu ba sentru votasaun sira, iha salaun Alfándega Palaban Oé-Cusse, sesta ne’e.
“Ohin ita mai hamutuk iha fatin ne’e, atu distribui materiál sensitivu no naun-sensitivu, atu aban realiza elesiaun suku iha Oé-Cusse, ha’u husu sidadaun hotu, kontribui tanba misaun PNTL koloka ba sentru votasaun atu fó seguransa, tanba ema hotu hakarak eleisaun ida agora tenki la’o ho pás, sei ema ruma tenta halo impede ka instabiliza, sei hasoru seguránsa,” nia katak.
“Husu mós PNTL hotu atu hatudu ita-boot sira-nia profisionál, komportamentu ezemplár bainhira ita-boot sira destaka iha sentru votasaun,” nia fó hanoin.
Notísia relevante: Autoridade RAEOA konfia órgaun eleitorál tau matan ba Eleisaun Suku
Tuir nia, tanba eleisaun ida agora ne’e última elesiaun ba xefe suku nian, depois eleisaun Prezidenti Repúblika no eleisaun parlamentár, mezmu eleisaun bo’ot rua, ultrapasa ona, mosu akontesimentu, maibé ninia impaktu ne’e la bo’ot no la fó ba seguránsa iha territóriu nasionál, espesialmente iha Oé-Cusse Ambeno.
“Ha’u husu dala ida-tán ba PNTL sira, horsehik ita hala’o ita-nia sofors, ita hatudu ita-nia forsa ba iha públiku iha rejionál Oé-Cusse, tanba ita iha buat rua atu halo, primeiru prevensaun segundu atuasaun,”
Prevensaun realiza ona, hatudu ba públiku katak, PNTL ho forsa destakadu Oé-Cusse, preparadu atu hasoru eleisaun xefe suku.
Kona-bá atuasaun, sekarik krime ruam akontese iha fatin públiku ne’ebá, entaun mak ne’e, PNTL sira-ne’ebé maka destaka iha fatin sentru votasaun, bele koordena direita ho prezidente meja no orgaun eleitorál sira, para ita-bele halo atuasaun.
“Tanba atuasaun ne’e tenki ho pesoasivu, PNTL nu’udar aparelu Estadu, ne’eb’e maka konsagra iha konstituisaun rtigu 5 no 47, defende legalidade demokrátiku sidadaun sira-nia direitu maibé sira labele iha partidu polítika,” nia dehan.
Tan ne’e, nu’udar responsabél másima seguránsa iha Rejiaun Oé-Cusse Ambeno, husu sidadaun hotu iha territóriu Oé-Cusse atu kopera kontribui pás-estabilidade iha ámbitu eleisaun suku.
“Ha’u nu’udar komandante rejionál Oé-Cusse, apela ba ita hotu, Oé-Cusse zero konflitu, tenki hatudu ezemplu ba rai bo’ot, katak Oé-Cusse hakribi violénsia no krime, tanba daudaun ita akompaña iha fatin barak akontese problema oi-oin, ema oho malu, sunu uma no ataka malu, maibé Oé-Cusse sai hanesan barometru atu hatudu ba rai bo’ot, tempu konflitu liu ona, agora tempu atu dezenvolve,” nia akresenta.
Nia hateten, eleisaun suku ne’e hanesan eleisaun reprezentante Xefe Estadu ne’ebé ki’ikliu iha baze maka xefe suku, ne’e duni persiza ema hotu hatudu komportamentu di’ak iha loron eleisaun.
“Liu-liu responsável primeiru sira, PNTL mak sai save ba seguránsa, bainhira lori materiál sira-ne’e to’o sentru votasaun labele abandona responsabilidade hodi vizita ba família, ha’u lakoi rona, kuandu PNTL halo problema iha prosesu kontajén votasaun, sei ha’u rona, ne’e ita ko’alia buat seluk ona, tanba ema hotu nia hakarak eleisaun ne’e tenki la’o ho justu independente,”
Notísia relevante:PNTL Oé-Cusse preparadu asegura Eleisaun Suku no garante la’o ho susesu
Entretantu, tuir polítika komandu PNTL rejiaun Oé-Cusse nian, koloka membru na’in-rua kada sentru votasaun 63 iha territóriu Oé-Cusse no hetan apoia másima hosi F-FDTL, Battalon Ordén Públika (BOP) ne’eb’e destakadu iha Oé-Cusse,
Jornalista: Abílio Elo Nini
Editór: Evaristo Soares Martins
