Autoridade RAEOA konfia órgaun eleitorál tau matan ba Eleisaun Suku
OÉ-CUSSE, 27 outubru 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretáriu Rejionál ba Asuntu Administrasaun, Martinho Abani Elo, reprezenta Prezidente Autoridade, husu ba orgaun eleitorál sira hanesan STAE no CNE atu tau matan ba eleisaun suku, nune’e bele la’o ho transparánsia independente no justu ba ema hotu.
Notísia relevante: Feto na’in-haat hosi Oé-Cusse sei kompete ho mane 89 iha eleisaun suku
Sekretáriu Rejionál ba Asuntu Administrasaun, Martinho Abani Elo, hato’o nia apelu ne’e iha ámbitu distribuisaun materiál sensitivu no la’ós sentitivu ba sentru votasaun 63 iha salaun Alfándega Palaban Oé-Cusse, sesta ne’e.
“Ofisiál STAE apoia suku no aldeia inklui CNE, ohin imi hamutuk ho materiál sira ba suku no aldeia sira, aban realiza eleisaun suku, hetan apoia másimu hosi PNTL, orsida imi ba haree dalan tenke to’o fatin destinasaun ho kondisaun di’ak,” Martinho Abani Elo fó hanoin.
Autoridade ne’e relembra, kona-bá eleisaun, la’os foin mak akontese, realiza ona dezde eleisaun prezidensisál to’o eleisaun parlamentár, iha RAEOA mezmu kampaña hasoru malu ida dalan trata malu maibé liman nunka kona malu.
“Ne’ebé autoridade fi’ar katak eleisaun ida-ne’e sei la akontese buat ruma, ofisiál eleitorál sira STAE ho CNE, ita-nia apoia importante atu tau matan ba lala’ok eleisaun suku, servisu hamutuk ho sira iha baze, tanba ita hakarak eleisaun ne’e la’o ho justu povu ezersie nia direitu votu ho seguru,” nia katak.
Notísia relevante: PNTL Oé-Cusse preparadu asegura Eleisaun Suku no garante la’o ho susesu
Prezidente CNE, José Belo, reforsa-tán, antes ne’e ofisiál STAE apoia suku aldeia no CNE simu ona formasaun kona-bá lala’ok eleisaun nian, nune’e sei garante katak, iha Oé-Cusse sei la hamosu fraude eleitorál.
“Tanba eleisaun la’os foin mak akontese iha Oé-Cusse, ne’ebé ita garante sei la halo fraude ruma iha ne’ebá no laiha problema ruma, tanba prezensa primeiru STAE ajuda sira, segundu CNE kada aldeia suku koloka ema ida, tan ne’e imi bele apoia xefe suku ida, maibé labele hatudu imi-nia komportamentu la’ós apoia A ka B, hakarak ba vota, vota ho konsiénsia,” nia fó hanoin.
Tan ne’e, hosi PNTL no F-FDTL, órgaun eleitorál fiar másimu ba seguransa, atu koopera hamutuk, nune’e fó susesu ba eleisaun lideránsa lokál sira.
“Tanba ne’e prezensa seguránsa iha sentru votasaun la’os ameasa se de’it, maibé fó seguránsa bai ta hotu, ne’ebé ha’u husu vota ho rasionál tanba hili sala agora, sei hein tinan hitu maka foin bele vota fali xefe suku foun,” nia fó hanoin.
Diretora STAE Oé-Cusse, Luiza da Costa, eleisaun suku realiza bazeia Lei númeru 9/2016 kona-bá lei orgaun suku no Dekretu-Lei númeru 14/2016 kona-bá regulamentu prosesu eleitorál, tan ne’e xefe suku ne’ebé sei eleitu liuhosi prosesu votasaun universál sekretu no pesoál.
“Aban ita hotu realiza ita-nia eleisaun suku iha Timor-Leste espesiálmente Oé-Cusse, ita hotu persiza kontribuisaun iha sentru votasaun idak-idak, liu-liu ha’u-nia pesoál apoia suku no apoia aldeia sira, tenki akompaña nafatin materiál ne’ebé ohin distribui ba suku no aldeia sira, atu prepara ba aban, espera bele to’o ho kondisaun di’ak,” nia dehan.
Notísia relevante:Materiál eleisaun suku Oé-Cusse nian to’o ona, aban kontinua pakotementu
Jornalista: Abílio Elo Nini
Editór: Evaristo Soares Martins
