Materiál eleisaun suku Oé-Cusse nian to’o ona, aban kontinua pakotementu

OÉ-CUSSE, 24 outubru 2023 (TATOLI) – Materiál eleisaun suku ne’ebé transporta hosi nasionál ba Rejiaun Administrativa Espesiál Oé-Cusse Ambeno (RAEOA), liuhosi transporte terrestre, tersa ne’e, to’o ona Oé-Cusse, no ekipa sei kontinua verifika kedan prepara halo pakotementu iha aban kuarta (25/10/2023).

 Notísia relevante: Governu distribui ona buletin votu livru 18.854 ba munisípiu 13-RAEOA 

Diretora STAE Oé-Cusse, Luiza da Costa, informa, materiál hirak-ne’e, transporta liuhosi tranpsorte Terrestre fronteira nian, hetan akompañamentu direita hosi Polísia Nasionál Timor-Leste (PNTL) no Komisaun Nasionál Eleisaun (CNE, sigla portugés).

 “Ohin foin to’o iha lorokraik ne’e, agora ofisiál apoia suku sira, hala’o hela verifikasaun ba materiál la’ós sensitivu sira; karik balu la kompletu, sei iha atempu atu informa ba nasionál para aumenta, tanba pakotementu ne’e ita sei halo iha aban to’o kinta,” Luiza da Costa ba Tatoli iha salaun Alfandega Palaban, Oé-Cusse.

Nia informa, materiál la’ós sensitivu sira hanesan, regua, bateria, markadór, kamizola, banner, lapijeira, pregu, no seluk-tán.

“Kona-bá materiál sensitivu sira, hanesan livru tinta ohin ita seidauk verifika atu hatene nia totál, tanba ekipa nasionál mak lori lista materiál sira-ne’e, sei to’o mai Oé-Cusse aban, agora ita verifika de’it materiál sira la’ós sensitivu,” nia subliña.

Tuir nia, oráriu pakotementu ne’e, sei halo durante loron rua, kuarta no kinta, tanba iha loron sesta 27 outubru halo ona seremónia distribuisaun ba sentru votasaun sira hamutuk 63 iha territóriu Oé-Cusse, hodi prepara ba eleisaun suku akontese iha sábadu 28 outubru 2023 ne’e.

Notísia relevante: Feto na’in-haat hosi Oé-Cusse sei kompete ho mane 89 iha eleisaun suku

Entretantu, tuir dadús kandidatura xefe suku iha Oé-Cusse hamutuk na’in-93 envolve feto na’in-haat, mai hosi suku 18 no sub-rejiaun haat, hanesan, iha sub-rejiaun Pássabe kandidatura hamutuk na’in-14, komposta hosi suku Abani na’in-11, mane 10 no feto ida, iha suku Malelat haat, mane tolu no feto ida.

Iha sub-rejiaun Oésilo kandidatura hamutuk na’in-14 maioria mane hotu, komposta hosi suku Bobometo na’in lima, suku Usitasa’e na’in neen no suku Usitaqueno na’in tolu.

Iha sub-rejiaun Nítibe kandidatura hamutuk na’in-25 maioria mane hotu, komposta hosi  suku Ban-Afi na’in-hitu, Bene-Ufe na’in haat, Lela-Ufe na’in ulu, Suni-Ufe na’in rua no suku Usitaku na’in-haat.

Iha sub-rejiaun Pante Makasar kandidatura hamutuk na’in-37, komposta hosi suku Bobokase na’in haat, Cunha na’in haat, Costa na’in hitu, mane neen no feto ida, Lalisuk na’in tolu, Lifau na’in lima, Naimeko na’in hitu, Nípani na’in haat mane tolu no feto ida suku Taiboko na’in-tolu.

Notísia relevante: STAE Oé-Cusse fasilita formasaun ba lideransa komunitária hodi hasoru eleisaun suku

Jornalista: Abílio Elo Nini

Editór: Rafael Ximenes de A. Belo