COVALIMA, 28 outubru 2023 (TATOLI)- Administradór munisípiu Covalima, Francisco de Andrade, observa direta situasaun iha sentru votasaun iha postu administrativu Suai no Maucatar.
“Ha’u mai halo monitorizasaun iha sentru votasaun, dalaruma mosu lakuna hodi fó atensaun nune’e labele sai husi regra ne’ebé vigora ona”, Francisco de Andrade hatete iha sentru votasaun Tabakolot.
Durante halo observasaun, eleitór sira ezerse direitu votu hodi hili sira-nian líder sira ne’e la’o ho di’ak.
Eleisaun komunitária ne’e hetan mós observasaun husi Komisaun Nasionál ba Eleisaun (CNE, sigla portugés) liuhusi ofisiál supervizaun sira ne’ebé destaka ona iha sentru votasaun no estasaun votu ne’ebé kria ona iha munisípiu.
Nia dehan kona-ba partisipasaun eleitór sira atu hili líder komunitáriu sira katak votante sira mós hatene loron atu hili, maibé balun partisia no balun la partisipa
“Ita halo kontrolu la’ós ema pur ema , maibé liuhusi sira-nian prezensa iha sentru votasaun no estasaun votu ne’ebé mak kria ona iha munisípiu Covalima”, dehan.
Diretór STAE Covalima, Francisco Gusmão, dehan eleisaun hahú la’o iha 08h ne’ebé meza eleitorál simu lista kandidatura, xefe aldeia, delegadu no delegada no iha 09h hahú votasaun.
“Prosesu votasaun ita-nian eleitór sira simu boletin votu sira hanesan xefe suku, xefe aldeia, delegadu no delegada”, esplika.
Eleisaun xefe suku ba tinan 2023, STAE Covalima kria sentru votasaun hamutuk 148 iha suku 30 iha postu administrativu Fatululik, Fatumea, Fohorem, Maucatar, Tilomar, Suai no Zumalai.
Tuir observasaun husi jornalista Tatoli, sentru votasaun no estasaun votu hetan seguransa másima husi Polísia Nasionál Timor-Leste.
Notísia relevante: Autoridade Covalima distribui materiál eleisaun ba postu administrativu haat
Jornalista: Celestina Teles
Editora: Maria Auxiliadora
