Komunidade Covalima preokupa ho sistema atendimentu hakerek ho liman
COVALIMA, 28 outubru 2023 (TATOLI)—Komunidade Covalima preokupa ho sistema atendimentu hakerek ho liman ka Sistema manual, bainhira eleitór sira atu ezerse sira-nia direitu votu ho prosesu ida kle’ur demais, tanba tékniku meza eleitorál atende eleitór sira hodi hakerek naran ho liman.
Notísia Relevante: Komunidade Tirilolo preokupa Eleisaun Suku atende ho sistema manuál
“Ami preokupa Governu realiza eleisaun suku maibé prosesu atendimentu hakerek de’it ho liman nune’e prosesu atendimentu la’o kleur tebes,” Tito Abilio Sacramento hato’o preokupasaun ne’e ba Agência Tatoli iha sentru votasaun Ailok Laran, suku Camanasa, Covalima, sábadu ne’e.
Eleisaun ba lideransa komunitária ne’e importante tanba xefe suku sira mak besik komunidade, maibé Governu realiza eleisaun suku ida-ne’e ladón fó importánsia.
Razaun Governu la fó importánsia, nia dehan, tanba Governu realiza eleisaun suku ne’e meza eleitorál halo atendimentu uza Sistema manuál ka hakerek de’it ho liman, nune’e halo prosesu ne’e la’o kle’ur tebes, ne’ebé halo eleitór sira hein kleur hodi forma habai-aan iha loron manas no baruk atu vota.
“Ita halo komparasaun Governu realiza eleisaun jerál ne’e, halo atendiementu ho de’it lalais, maibé ba eleisaun lideransa komunitária ne’e meza eleitorál halo atendimentu hakerek de’it ho liman,” nia dehan.
Komunidade Marcos Taran mós hato’o nia preokupasaun hodi dehan, maske prosesu eleisaun la’o ho di’ak tanba halo atendimentu prióridade ba ema difisiénsia, idozu, maibé sistema atendimentu hakerek eleitór sira-nia naran ho de’it lapizera.
“Ami-nia haree katak halo atendimentu maibé problema uitoan meza eleitór sira halo atendimentu hakerek eleitór sira-nia naran hakerek de’it ho lapizera,” nia dehan.
Diretór STAE Munisípiu Covalima, Francisco Gusmão, rekoñeseeleisaun lideransa komunitária la’o ho di’ak maibé hasoru difikuldade uitoan iha prosesu atendimentu hakerek eleitór sira-nia naran uza de’it sistema manuál.
“Kmunidade dúvida prosesu ne’ebé ita uza iha sentru votasaun tanba hakerek eleitór sira-nia naran uza de’it manuál difikulta sira halo prosesu eleisaun la’o tarde,” nia hateten.
Preparasaun ba eleisaun Suku, STAE Covalima kria sentru votasaun bazeia ba aldeia ne’ebé eziste ona iha munisípiu Covalima mak aldeia hamutuk 148, suku 30 ho nia postu administrativu sira hanesan Fatululik, Fatumea, Fohorem, Tilomar, Maucatar, Suai no Zumalai.
Jornalista : Celestina Teles
Editór : Cancio Ximenes
