Aderito Hugo sei aprezenta pedidu retira kandidatu komisáriu CAC ba KM
DILI, 30 outubru 2023 (TATOLI)—Vise Ministru ba Asuntu Parlamentár, Adérito Hugo da Costa, hateten sei aprezenta pedidu hosi bankada parlamentár atu retira kandidatu komisáriu Komisaun Anti-Korrupsaun (CAC) na’in-ida hosi kandidatu na’in-rua ne’ebé antes ne’e Governu submete mai iha Parlamentu Nasionál ba iha reuniaun Konsellu Ministru (KM).
Notísia Relavante: PN hein Governu deside retira kandidatu komisáriu CAC na’in-ida
Kestaun ida CAC ninian, nia dehan, kada sesta-feira nia-parte sempre mai tuir reuniaun líder bankada atu bankada sira ho meza Parlamentu fiksa ajenda ba plenária segunda ho tersa, entaun sesta liu ba konferénsia líder bankada ho prezensa líder bankada sira hotu diskute kona-ba asuntu ida-ne’e, iha nafatin kontaktu sira- ne’ebé mak halo nafatin
Hosi Governu, haree dinámika evolusaun kontaktu sira-ne’ebé iha no haree katak, líder bankada sira iha nafatin vontade atu halo komunikasaun.
“Iha kontextu ida-ne’e, Governu aguarda nafatin to’o sira konsensu. Realidade plenária iha segunda laiha ajenda, nune’e aguarda tan ba aban. Se aban laiha, ha’u sei aprezenta mós iha Xefe Governu iha Konsellu Ministru kona-ba situasaun ne’e, depois Governu bele foti desizaun. Tanba, labele husik kle’ur,” Vise Ministru ne’e hateten ba jornalista sira iha uma fukm PN, segunda ne’e.
Kona-ba PN hein desizaun Governu atu retira kandidatu na’in-ida hosi kandidatu na’in-rua ne’ebé antes ne’e submete mai, Aderito Hugo hatán, kontráriu Governu mak hein tanba observa hela iha nafatin vontade komunikasaun negosiasaun entre sira, entaun Governu fó nafatin tempu to’o semana ida-ne’e.
“Se ohin ho aban plenária ne’e mak laiha nafatin ajenda ba asuntu ne’e, signifika kontaktu ne’ebé bankada sira atu hala’o ne’ebé konsensu la konsege iha. Ami tenke haree ona oinsá aprezenta ba Primeiru-Ministru iha Konsellu Ministru hodi haree ba oin ne’e halo nusa,” nia hateten.
Jornalista : Nelson de Sousa
Editór : Cancio Ximenes
