VIQUEQUE, 07 novembru 2023 (TATOLI)—Internamentu munisípiu Viqueque kontinua halo atendimentu iha loron finadu ne’ebé rejista kazu emerjénsia 29 no asidente tráfiku rua.
“Hahú hosi loron 31 outubru to’o loron finadu, ami kontinua halo atendimentu ba ita-nia abitante sira ne’ebé moras iha loron férias. Kazu emerjénsia kompostu hosi Ema adultu na’in-27, labarik na’in-rua inklui asidente tráfiku na’in-rua, hetan asidente ho motorizada atu viajen ba postu kari ai-funan maka monu,” Xefe Sentru Viqueque Vila, Celestina Soares, informa, iha Internamentu, Beloi, tersa ne’e.
Notísia relevante : PNTL Viqueque rejista kazu 207 iha janeiru to’o novembru
Durante loron finadu maioria pasiente rekupera inklui insidente rua. Moras ne’ebé rejista iha loron finadu maioria infesaun respiratóriu aguda 25 no diareia haat.
Aleinde ne’e, pesoál saúde sira iha maternidade Kemom-B fó partu ba inan isin-rua hamutuk na’in-11 ho kondisaun bebé moris ho normál.
“Nune’e inan isin-rua sira bainhira partu hotu sira fila kedan bá sira-nia rezidénsia,” nia akresenta.
Stock ai-moruk iha Internamentu sufisente hela hodi halo atendimentu ba pasiente sira-ne’ebé mai halo tratamentu.
Jornalista : Vitorino Lopes da Costa
Editora : Julia Chatarina
