iklan

HEADLINE, MUNISÍPIU, VIQUEQUE

PNTL Viqueque rejista kazu 207 iha janeiru to’o novembru

PNTL Viqueque rejista kazu 207 iha janeiru to’o novembru

Komandante PNTL munisípiu Viqueque, Superintendente, Sebastião Alves Quintão. Imajen Tatoli/Vitorino Lopes da Costa

VIQUEQUE, 15 novembru 2022 (TATOLI)—Polísia Nasionál Timor-Leste (PNTL) munisípiu Viqueque rejista ona kazu hamutuk 207, durante fulan-janeiru to’o novembru tinan ne’e.

“Ami aprezenta ona ba Ministériu Públiku hamutuk 173, rezolve tuir família 22 no sei prosesu nia laran 12, seluk ami sei halo identifikasaun,” Komandante PNTL munisípiu Viqueque, Superentendente, Sebastião Alves Quintão, hateten iha ninia knaar fatin, Viqueque Vila, tersa ne’e.

Kazu rejistadu maioria ho tipu violénsia doméstika, enkuantu iha loron finadu asidente laiha.

“Kazu sira-ne’e maioria hanesan violénsia doméstika, ne’ebé ita haree kuaze akontese beibeik tanba dala ruma afeta hosi situasaun ekonomia, maibé ami halo esforsu no parseru sira hodi ko’alia nafatin ho komunidade atubele redús kazu violénsia ne’ebé domina liu iha munisípiu Viqueque,” nia akresenta.

Notísia relevante: Uma Mahon Viqueque rejista kazu viólensia doméstika no sexuál 36

Aleinde ne’e, Komandu PNTL munisípiu Viqueque sei kontinua halo kolaborasaun ho autoridade lokál no organizasaun sira hotu hodi redús númeru kazu sira.

“Ha’u kontinua esforsu hodi kolabora ho parte autoridade lokál, tantu organizasaun partidu polítiku no organizasaun arte-marsiál sira iha Viqueque. Hosi kolaborasaun sira ita bele haree situasaun atake malu entre grupu ho grupu agora daudaun hahu redús,” nia tenik.

Maski nune’e, munisípiu Viqueque oras ne’e seidauk iha problema boot kompara ho munisípiu balun.

“Ohin loron ita haree iha munisípiu Viqueque seidauk iha akontesementu hodi afeta ba ema-nia vida. Iha munisípiu seluk,  ita haree foin lalais ne’e ema asaltu malu to’o ema lakon vida. Ho ida-ne’e munisípiu Viqueque ita konsidera hakmatek,” nia hato’o.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!