VIQUEQUE, 02 juñu 2022 (TATOLI)–Uma Mahon K’nua Haberan Komunidade (KHK) Viqueque rejista kazu violénsia doméstika no violénsia sexuál hamutuk 36 iha janeiru to’o maiu 2022.
“Kazu violénsia doméstika hamutuk 21 no violénsia sexuál hamutuk 15, ne’ebé hosi kazu tipu rua ne’e, Uma Mahon re-integra ona ba família maibé prosesu legál maka daudaun kontinua la’o,” Koordenadora Uma Mahon KHK Viqueque, Cristina Rosawati Gusmão, hateten ba Agência Tatoli, iha ninia knar fatin, Beobe, kinta ne’e.
Tuir Koordenadora, prosesu legál kontinua la’o tanba maioria seidauk hetan desizaun no solusaun ruma ba vítima sira-nian problema.
“Ita nafatin akompaña to’o prosesu rejistu no presta deklarasaun iha Ministériu Públiku (MP), seidauk to’o iha Tribunál. Maibé hosi kazu hirak ne’e ami akompaña de’it, atu lori ba Ministériu Públiku ne’e parte Polísia mak lori, enkuantu ami-nia serbisu maka akompaña tipu rua ne’ebé rejista iha Uma Mahon Viqueque,” nia akresenta.
Notísia relevante: Uma Mahon Viqueque fó ona asisténsia ba kazu labarik 157
Nia dehan, kazu sira mosu tanba problema ekonomia, tanba kestaun ne’e sempre hamosu viólensia doméstika, enkuantu violénsia sexuál mosu tanba ema-nia koñesimentu kona-ba proteje sira-nia an no mós labarik sei menus.
“Tanba ne’e, ita haree kazu sira ho númeru a’as hela de’it. Bazeia ba informasaun sira ne’ebé Uma Mahon hetan hosi vítima sira ne’ebé mai hama’an-an iha Uma Mahon,” nia tenik.
Tuir Koordenadora, atu redús kazu sira, presiza halo sosializasaun hodi fahe informasaun ba komunidade, hakbiit sira área hotu liuliu ba área ekonomia inklui hasa’e ema-nia konsiénsia hodi hatene ema hotu ninia diretu no devér.
“Nune’e ita bele minimiza kazu balun ne’ebé maka ita sempre rejista hanesan violénsia doméstika, violénsia sexuál no kazu sira seluk, bainhira laiha koñesimentu no konsiénsia rasik maka kazu sira akontese ho númeru a’as. Nune’e mós ita presiza hasa’e koñesimentu liuliu iha área ekonomia hodi halo jestaun ba rendimentu no jestaun ba talentu sira,” nia salienta.
Jornalista : Vitorino Lopes da Costa
Editora : Julia Chatarina