INSS simu tetu orsamentu hosi MF millaun $83
DILI, 08 novembru 2023 (TATOLI)–Prezidente Administrasaun Institutu Nasionál Seguransa Sosiál (INSS), Longuinhos Leite, hatten INSS simu tetu orsamentu hosi Ministériu Finansa (MF) hamutuk millaun $83.
Notísia Relevante: Implementasaun subsídiu idozu ba $100 sei hahú iha 2024
“Tetu orsamentu ne’ebé ita simu hosi Ministériu Finansa hamutuk miliaun $83, no ida-ne’e ita sei funsiona ba saláriu no vensimentu, bens servisu no kapitál menór. Maibé ita foin daudaun ne’e halo proposta ba MF no ita presiza millaun $111. Maibé ida-ne’e mós seidauk fiksu tanba mudansa tan iha transferénsia públika, tanba Governu hasa’e idozu no invalidéz nia subsídiu ne’e ba $100,” Prezidente INSS hateten ba Agência Tatoli, iha nia kna’ar fatin Caicoli, kuarta ne’e.
Transferénsia públiku ne’e, nia dehan, INSS husu aumenta osan hosi millaun $75 to’o millaun $99-resin.
“Ne’ebé ita presiza osan ba programa sira INSS nian kuaze millaun $180, tanba aumenta ba pagamentu idozu no invalidéz ne’ebé Governu hasa’e hosi $57 ba $100. Bainhira ita muda mak lori fali ba MF,” nia dehan.
Governu aprova dekretu-lei númeru 53/2022, ne’ebé Prezidente promulga ona iha 20 jullu 2022, ba subsídiu idozu no invalidez nian.
Notísia Relevante: Prezidente Repúblika promulga Dekretu-Lei hodi harii fundu rezerva ba seguransa sosiál
Jornalista : Osória Marques
Editór : Cancio Ximenes
