PA RAEOA fó hanoin kompañia sira aselera projetu atu kontribui ba ezekusaun OJE 2023
OÉ-CUSSE, 07 novembru 2023 (TATOLI – Prezidente Autoridade Rejiaun Administrativa Espesiál Oé-Cusse Ambeno (RAEOA) fó hanoin ba kompañia sira atu aselera projetu sira no atualiza progresu servisu ba Diresaun Rejionál Infraestrura (DRI) nune’e bele hetan pagamentu hodi kontribui ba ezekusaun Orsamentu Jerál Estadu (OJE) 2023 RAEOA nian.
Notísia relevante: Ezekusaun OJE 2023, RAEOA atinje 61% korresponde millaun $51
Arsénio Paixão Bano, hato’o nia esperánsa ne’e bainhira hala’o enkontru ofisiál ho kompañia sira iha Otel Ambeno Oé-Cusse, segunda ne’e.
“Ohin Autoridade enkontru ho parseria Autoridade nian, importante tanba halo sasán barak ona, ita haree servisu balu la’o maka’as no balu la’o neineik, maibé iha mudánsa barak ita halo ona, ha’u hanoin ho ita-boot sira-nia kooperasaun servisu hirak liuliu ba obra fíziku sira ita halo tiha ona iha Oé-Cusse, liuliu iha ha’u-nia mandatu,” Arsénio Paixão Bano, ko’alia iha otél Ambeno Oé-Cusse.
“Autoridade husu ajuda, ita-boot sira presiza atualiza progresu servisu ba obra públika kona-bá projetu sira-ne’ebé ita-boot sira hala’o daudaun, atu nune’e bele halo pagamentu atu kontribui hasa’e ita-nia ezekusaun OJE RAEOA nian,” nia fó hanoin.
Notísia relevante: OJE 2024, RAEOA husu adisionál millaun $20 ho opsaun rua
Ezekutivu ne’e, informa, pagamentu ba projetu sira ne’e, kompañia sira submete pedidu pagamentu tenke iha loron 15 detembru mai kraik, tanba ne’e atu taka ezekusaun OJE 2023 atu tama ba OJE 2024 nian, tan ne’e kontinua esforsa presiza atualiza beibeik progresu servisu.
“Projetu barak ita halo iha tinan ne’e sei finaliza iha tinan oin, balu hahú iha tinan kotuk sei hotu iha tinan ne’e, no projetu balu hotu ona, hanesan bee-moos balu estrada no edukasaun nian, tán ne’e mak dalaruma ami ba halo fiskalizasaun ba ita-boot sira, atu hatene nia progresu fíziku nune’e bele halo ona pagamentu balu,” nia apela.
Tanba haree ba ezekusaun daudaun, Autoridade ho senáriu ida katak to’o dezembru 2023 ezekusaun RAEOA tenke atinje to’o atinje 85% ba FED bele to’o 95%, tanba haree ba reseita estimada to’o tinan ramata RAEOA no ZEESM-TL sei tranzita ba tinan 2024 ho saldu jerénsia $88,181,959.00.
Iha fatin hanesan, Adérito Punef, agradese ba Autoridade tanba bele realiza enkontru nune’e bele enkoraja atu aselera projetu sira, tanba liga mós ho mudansa lei númeru 3/2024 kona-bá kriasaun RAEOA no ZEESM-TL.
“Ami agradese tanba ohin ita hamutuk atu partilla informasaun liga ho orsamentu, ami hanesan kompañia ami sei kumpri, hanesan ohin Prezidente Autoridade hateten, estimasaun to’o dezembru 2023 ita-nia ezekusaun tenke sa’e to’o 85%, ida-ne’e ami orgullu no sei esforsa atu aselera progresu servisu ba obra sira,” nia katak.
Notísia relevante:RAEOA propoin millaun $93 iha tetu OJE 2024 atu konklui projetu 99
Jornalista: Abílio Elo Nini
Editór: Evaristo Soares Martins
