Aban, Governu distribui materiál rekuperasaun ba uma-kain 14 iha Lourba-Carabau
BONONARO, 09 novembru 2023 (TATOLI) – Tuir planu, 10 novembru ne’e Governu liuhosi Sekretaria Estadu Protesaun Sivíl (SEPS) distribui materiál rekuperasaun ba uma-kain 14 iha suku Lourba no Carabau, postu administrativu Bobonaro, munisípiu Bobonaro, ne’ebé antes ne’e hetan estragus totál.
Komandante Opersaun Autoridade Protesaun Sivíl, Munisípiu Bobonaro, Inspetór Polisía José Lelo Bere, esplika, vítima ne’ebé hetan apoia rekuperasaun ne’e bazea ba verifikasaun dadus, uma-kain ne’ebé mak aat totál unidade neen, aat kmaan neen no natoon rua hafoin akontese insidente iha loron (02/11) to’o loron (03/11).
Notísia relevante: Situasaun iha suku Lourba no Carabau seguru no kontroladu
“Uma hamutuk 14 mak atu hetan apoia rekuperasaun ,uma 13 pertense ba suku Lourba, só ida de’it mak iha suku Carabau, agora daudaun Autoridade Protesaun Sivíl Munisípiu Bobonaro simu ona kontaktu hosi nasionál mai katak, apoia rekuperasaun ne’e sei to’o iha Bobonaro orsida lokraik no aban ita sei dezloka ba postu administrativu Bobonaro hodi halo distribuisaun,” nia informa ba Tatoli iha Maliana, kinta ne’e.
Inspestór Polisía ne’e subliña, temporariamente vítima hirak-ne’e sei hela ho família no viziñu nia uma ne’ebé besik.
Ba kestaun ne’e, Governu aselera prosesu distribuisaun materiál rekuperasaun atu vítima sira bele konstrui fali sira-nia uma, tanba la kleur tán udan monu-rai.
“Bainhira apoia rekuperasaun ne’e aban to’o, ami sei entrega ba vítima sira, ne’ebé husu ba komunidade sira iha suku rua ne’e katak udan besik monu-rai, sé bele autoridade lokál organiza joven sira atubele harii lalais sira-nia hela-fatin, ne’ebé mak hetan estragus,” Komandante José apela.
Iha loron 04 fulan-novembru ne’e, APC fó ona apoia emerjénsia ba uma-kain 27, mai hosi suku Carabau uma-kain haat no 23 hosi Lourba. Iha momentu-ne’ebá Primeiru Ministru, Kay Rala Xanana Gusmão, mós fó apoia nesesidade bázika ba família ne’ebé sai vítima ba insidente ne’e.
Notísia relevante: Joven Lourba-Carabau hala’o limpeza jerál
Jornalista : Sérgio da Cruz
Editór : Evaristo Soares Martins
