BOBONARO, 06 novembru 2023 (TATOLI) – Joven sira hosi suku Lourba no Carabau, postu administrativu Bobonaro, munisípiu Bobonaro, Segunda ne’e realiza atividade limpeza jerál hafoin insidente ne’ebé akontese iha loron 03 fulan-novembru ne’e.
Hafoin asalta malu iha sesta loron (03/11) ne’e, segunda (06/11) joven sira-ne’ebé hola parte iha konfrontu refere halo limpeza jerál hahú hosi suku Lourba to’o suku Carabau, postu administrativu Bobonaro, munisípiu Bobonaro hodi hamoos uma ne’ebé hetan sunu no estragu.
Atividade limpeza ne’e akontese, hafoin autoridade munisípiu Bobonaro no Polísia Nasionál Timor-Leste (PNTL), komandu munisípiu Bobonaro organiza asaun dame iha loron 05 fulan-novembru ne’e.
Notísia relevante: PM Xanana halo diálogu ho komunidade Lourba no Karabau
“Kazu ne’e ha’u foti desizaun, horisehik ami rezolve ona no sira simu malu ona, laiha problema, depois eventu ida-ne’e hotu mak sei nahe biti-boot,” Prezidente Autoridade Munisípiu Bobonaro, Ernesto de Oliveira Barreto, informa ba Jornalista sira, iha merkadu Maliana, segunda ne’e.
Nia parte foti desizaun ba asaun dame ne’e, atu kumunidade suku rua bele partisipa iha eleisaun suku volta daruak iha loron 13 fulan-novembru ne’e no eventu interkámbiu Festivál Kulturál Fronteira ne’ebé sei realiza iha tempu badak.
“Ha’u-nia mensajen ba suku Lourba, Carabau no suku haat sira seluk iha-ne’ebá, eventu ida-ne’e importante la halimar, eventu internasionál, husu kontribuisaun joven sira atubele asegura eventu ida-ne’e, tanba ne’e imajen nasaun ninian,” nia apela.
Atividade ne’ebé hahú tuku 09:00 ne’e akompaña hosi forsa seguransa konjunta kompostu hosi Polísia Nasionál Timor-Leste, Eskudra Postu administrativu Bobonaro, Batallaun Orden Públika (BOP), Komandu Operasaun Espesiál (COE) no FALINTIL-Forsa Defeza Timor-Leste (F-FDTL).
Notísia relevante: PNTL no F-FDTL halo pasa revista iha área Lourba-Karabau
Jornalista: Sérgio da Cruz
Editór: Evaristo Soares Martins
