DILI, 06 novembru 2023 (TATOLI)- Hafoin intervensaun autoridade seguransa no dialógu komunitáriu, situasaun iha suku Lourba no Carabau, la’o normál hikas.
Portavós Komandu Jerál PNTL, Superintendente Polísia, António da Luz, hateten, situasaun iha Suku Lourba no Carabau Postu Administrativu Bobonaro Munisípiu Bobonaro, seguru no kontroladu.
“Agora dadaun iha fatin ne’ebá mós seguransa no forsa (F-FDTL) asegura nafatin iha fatin iha ne’ebá. Parte seguransa no forsa hahú halo dialógu ho komunidade sira iha ne’ebá no agora situasaun la’o hakmatek; laiha tán problema,” António da Luz hateten ba jornalista sira iha Sentru Formasaun Polísia (CFP, sigla portugés), Comoro, Dili, tersa ne’e.
Autoridade polisiál ne’e dehan, situasaun iha Lourba no Carabau agora dadaun la’o normál tanba iha loron hirak liubá Prezidente Autoridade Bobonaro, Ernesto de Oliveira Bareto, hamutuk ho komunidade no autoridade hosi Suku Lourba no Suku Carabau inklui mós suku sira viziñu sira seluk organiza dialógu ba komunidade Suku Lourba no Carabau.
“Hosi dialógu komunitáriu ne’e komunidade Suku Lourba no Carabau sira promete katak sira koopera i situasaun ne’ebé mak akontese foin dadaun sei la akontese tan,” nia haktuir.
“Komunidade sira hosi suku rua no mós Xefe Suku hosi suku rua liuliu Carabau ho Xefe Suku Lourba haku’ak-malu i komunidade sira mós hakuak malu promete katak sei lakontese tan problema ne’e,” nia adianta.
António da Luz, hateten, agora dadaun Komandu PNTL Munisipiu Bobonaro liuhosi Eskuadra no Ofisiál Polísia Suku (OPS) sira iha Bobonaro hamutuk ho forsa sira destaka iha neebá kontinua halo dialógu iha suku sira seluk atu fó-hanoin ba komunidade sira seluk atu koopera ho autoridade sira halo prevensaun konflitu iha suku rua Lourba no Carabau atu labele mosu problema iha suku rua ne’e tan.
Notísia relevante:Vítima balu hosi kazu Lourba sei hela ho família
Jornalista: Natalino Costa
Editór: Rafael Ximenes de A. Belo
