Adérito sei aprezenta fali pedidu retira kandidatu komisáriu CAC ba KM

DILI, 09 novembru 2023 (TATOLI)—Vise Ministru ba asuntu Parlamentár, Adérito Hugo da Costa, hateten nia parte sei aprezenta fali pedidu hosi bankada parlamentár atu retira kandidatu Komisáriu Komisaun Anti-Korrupsaun (CAC, siglá portugés) na’in-ida ba iha reuniaun Konsellu Ministru.
Notísia Relevante: Aderito Hugo sei aprezenta pedidu retira kandidatu komisáriu CAC ba KM
Governu ninia obrigasaun aprezenta tiha ona kandidatu komisáriu CAV dezde fulan rua liu ba, maibé iha reuniaun líder bankada nafatin seidauk iha progresu kontaktu entre bankada sira atu bele hetan konsensu ida hodi ajenda ona ba eleisaun.
“Entaun, ha’u sei lori fali situasaun ne’e ba Primeiru-Ministru hodi tau konsiderasaun. Ami labele impoin tanba PN ne’e órgaun soberanu. Nune’e, ha’u sei aprezenta fali ba reuniaun Konsellu Ministru tuir mai, sobre situasaun ida agora. Ohin, ha’u mai tuir reuniaun konferénsia bankada atu rona buat ruma maibé realidade seidauk iha progresu,” nia hateten ba jornalista sira hafoin partisipa reuniaun líder bankada iha uma fukun PN, kinta ne’e.
Enkuantu, tuir ajenda reuniaun KM iha loron 08 novembru 2023, Vise Ministru asuntu Parlamentár aprezenta kestaun ne’e maibé seidauk iha desizaun, nune’e sei aprezenta fali iha KM mak haree desizaun.
Governu akompaña ho kuidadu tebes tanba desizaun ikus ne’e iha PN tuir rekezitu ne’ebé fó, entaun Governu akompaña kontaktu no negosiasaun ne’ebé sira hala’o to’o agora fó nafatin tempu ba sira.
Kona-ba pedidu banakada FRETILIN husu atu retira kandidatu na’in-ida (1) hosi kandidatu na’in-rua 92) ne’ebé antes ne’e submete mai PN hodi avansa ho kandidatu na’in-ida de’it, Adérito Hugo hatán, situasaun sira-ne’e aprezenta hotu ona no parte Governu akompaña hela hodi komunika ho Primeiru Ministru no Konsellu Ministru.
Maibé, nia dehan, Governu nafatin akompaña tanba negosiasaun ne’e sempre la fó tempu, tanba loron ohin situasaun oin seluk no aban bele situasaun seluk fali iha bankada sira-nian, entaun Governu kuidadu tebes.
“Se labele duni ona, ami Governu sei foti pozisaun no solusaun seluk. Ne’ebé, hanesan ezijénsia balun hakarak retira tiha kandidatu na’in-ida hodi aprezenta ida no iha seluk karik, sira laiha konsesu sei laiha tan ona dalan seluk. Alterasaun ba rekezitu lei CAC ho prezensa deputadu na’in-49, entaun situasaun ne’e labele ona Governu nia kompeténsia tomak bele haree buat rua. Ida, haree ezijénsia kontaktu no ida seluk alterasaun lei CAC,” nia hateten.
Notísia Relevante: Komisáriu CAC Sergio Hornai nia mandatu ramata iha 21 janeiru
Jornalista : Nelson de Sousa
Editór : Cancio Ximenes

