OÉ-CUSSE 09 novembru 2023 (TATOLI – Estadu Timor-Leste sei atribui kondekorasaun medalla orden Nicolau Lobato ba kombatente na’in-182 iha RAEOA nu’udar rekoñesimentu ba kontribuisaun luta libertasaun nasionál.
Notísia relevante:Konsellu Veteranu Oé-Cusse seidauk iha ossoario haloot restu mortál
Vise-Prezidente Konsellu Vetaranu Oé-Cusse, Xisto de Souza, ‘Boni-Bel’ hateten, atribuisaun kondekorasaun ne’e sei realiza iha ámbitu komemorasaun Loron Proklamasaun Unilaterál iha loron 28 Novembru 2023 ne’e.
“Atribuisaun ne’e sei hala’o hafoin ensera komemorasaun 28 novembru hamutuk 182 mai hosi zona lima, Pante Makasar A no B, Oésilo, Pássabe no Nítibe,” Xisto de Souza, ba Agência Tatoli iha Oé-Cusse, kinta ne’e.
Daudaun ne’e Konsellu Veteranu halo ona koordenasaun ho parte nasionál nune’e serimónia atribuisaun ne’e bele la’o di’ak.
“Ami prepara atu hasai karta konvite ba kombatente sira-ne’ebé válida ona naran hosi Governu, atu partisipa, tanba naran sira-ne’e taka ona iha kada zona idak-idak, ami mós koordena ona ba nasionál, tanba ita hakarak kondekorasaun ne’e tenke la’o di’ak,” nia afirma.
Nia informa, kombatente sira na’in-182 ne’e maioria 8 a 14, aumenta tán ho mártir na’in-hitu, naran sira-ne’e mós haruka mai hosi nasionál, ne’ebé rejista ona iha faze dahuluk 2003 no 2005.
Tuir dadus kombatente na’in-182 ne’e mai hosi zona lima, hanesan zona Pante Makasar A hamutuk na’in 37, zona Pante Makasar B na’in-35, zona Oésilo na’in-37, zona Pássabe na’in-36 no zona Nítibe na’in-37.
Notísia relevante: Veteranu 50 iha RAEOA simu kondekorasaun ho orden Nicolau Lobato
Entretantu tuir livru 3-C, Orsamentu Jerál Estadu (OJE) 2023 RAEOA-ZEESM Timor-Leste, haktuir, benefisiáriu ne’ebé hetan apoiu osan Estadu iha RAEOA ba kombatente ou veteranu libertasaun nasionál hamutuk ema na’in-363, no mártir libertasaun nasionál hamutuk ema na’in-223.
Jornalista: Abílio Elo Nini
Editór: Evaristo Soares Martins
