MESSK hahú loke inskrisaun ba estudante Oé-Cusse atu asesu UNTL no IPB
OÉ-CUSSE, 09 novembru 2023 (TATOLI – Ministériu Ensinu Superiór Siénsia no Kultura (MESSK) hahú loke inskrisaun ba estudante foun iha Rejiaun Administrativa Espesiál Oé-Cusse Ambeno (RAEOA) ho rejime rua atu asesu ba Universidade Nasionál Timor-Leste (UNTL) no Institutu Politéknika Betano (IPB) ba tinan akadémiku 2024.
Koordenadór Ekipa Inkrisaun, Justo da Silva, esplika, prosesu inskrisaun ne’e fahe ba rejime rua, rejime jerál no rejime espesiál, ho nia sub-rejime haat hanesan sub-rejime oportunidade, ba estudante sira-ne’ebé remata ensinu sekundáriu tinan haat (4) kotuk, hahú 2019 to’o 2022.
Rejime espesiál hakbiit (ba oan kiak), rejime veteranu no mártir nia oan no rejime tinan 23 ba sira-ne’ebé idade liu ona tinan 23.
Tuir nia, inskrisaun ne’e bazea diploma ministériál númeru 46/2023, loron 05 outubru, Governu fó dalan atu halo inskrisaun ba estudante sira-ne’ebé remata ona estudu iha nível ensinu sekundáriu hahú hosi 2019 mai to’o 2022 inklui sira-ne’ebé finalista iha 2023.
“Iha 2023 ita fó oportunidade liu ba sira-ne’ebé hakbiit no veteranu nia oan, sira seluk tama iha iha rejime jerál de’it, no tuir diploma ministériál númeru 46/2023, loron 05 outubru, fó sub-rejime 16, maibé hosi MESSK hanesan na’in mai halo inskrisaun iha Oé-Cusse ba sub-rejime haat,” Justo da Silva, ba Agência Tatoli iha salaun edukasaun Oé-Cusse, kinta ne’e.
Notísia relevante:http://MESSK disemina kritéria rejime jerál no espesiál asesu UNTL-IPB iha Oé-Cusse
Justo da Silva, esplika, kona-bá sub-rejime seluk hanesan veteranu sira, sei ba rejista iha Konsellu Veteranu, só oan maka bele mai iha MESSK, F-FFDTL no PNTL sei ba rejistu iha kuartél no oportunidade mós ba dizabilidade sira no sei rejista iha sira-nia fatin, hirak-ne’e depois submete ba MESSK.
Nia informa, kritériu atu asesu ba rejime hakbiit, presiza kartaun eleitorál ka billete identidade, fixa família ho diploma, sira-ne’ebé foin finalista iha 2023 ne’e, presiza submete deklarasaun hosi suku, tanba suku maka hatene liu kondisaun kbiit laek ou la’e, no mós deklarasaun hosi Ministériu Solidariedade Sosiál Inkluzaun (MSSI) munisipíu.
Kona-bá veteranu no mártir nia oan, nia kritéria dokumentu hanesan maibé kompleta ho fixa válidu veteranu, katak sira-ne’ebé hetan ona rekoñesimentu hosi Governu no deklarasaun hosi Konsellu Veteranu munisipál.
Notísia relevante:MESSK deside ona valór rejime jerál asesu UNTL-IPB
Justo da Silva, argumenta, durante prosesu inskrisaun komisaun rejista laiha trajetu ba kandidatura, tanba komisaun hala’o de’it inskrisaun rezultadu finál mak sei liuhosi teste.
“Ezemplu iha Oé-Cusse estudante na’in-500 maka submete dokumentu, depois teste maka termina, pasa ka lae, sei pasa hotu, ida-ne’e maka rezultadu ikus, ne’ebé laiha trajetu ba kada ba kandidatura sira,” nia informa.
Purtantu, MESSK halo halo inskrisaun iha Oé-Cusse, hahú iha loron segunda 06 sei termina iha loron sesta 10 novembru 2023 ne’e.
“Ita komesa iha segunda to’o ohin ita rejista ona estudante 150, ohin kinta ne’e agora sei prosesa hela seidauk kontajen to’o lorokraik taka mak foin halo kontajen no kontinua ba aban sesta loron ikus,” nia afirma.
Tuir kalendáriu, prosesu teste ba estudante rejime espesiál sira no jerál sei tuir ezame iha loron 30 novembru 2023 ne’e.
Notísia relevante: MESSK prevee millaun $5 apoia ensinu superiór privadu iha tinan 2024
Jornalista: Abílio Elo Nini
Editór: Evaristo Soares Martins
