DILI, 24 outubru 2023 (TATOLI)–Ministériu Ensinu Superiór Siénsia no Kultura (MESSK) halo aprezentasaun ba iha Komité Revizaun Orsamentu (KRO), ne’ebé realiza hosi Ministériu Finansa, kona-ba Orsamentu Jerál Estadu (OJE) tinan 2024.
“Orsamentu ne’ebé aloka ba ministériu hamutuk millaun $9-resin. Hosi totál ne’e millaun $5 prevee hodi apoia ba ensinu superiór privadu sira no institutu iha Timor-laran tomak,” Ministru Ensinu Superiór Siénsia no Kultura, José Honório da Costa Pereira Jerónimo, hateten, hafoin ramata aprezentasaun, iha Auditóriu Ministériu Finansa, Aitarak-laran, tersa ne’e.
Governante ne’e afirma, intensaun Governu apoia fundu ne’e tanba hakarak aposta ba kualidade nune’e aban-bainrua joven sira labele hotu-hotu hili Universidade Nasionál Timor-Lorosa’e (UNTL) de’it maibé sira iha alternativa seluk hodi hili ensinu superiór privadu no institutu.
Notísia relevante : MESSK sei kria Lei Baze Ensinu Superiór hodi garante kualidade iha IESPP
Maibé molok halo transferénsia, komisaun ida ne’ebé estabelese sei hala’o uluk vizita ida ba sira hodi identifika nesesidade iha área ne’ebé de’it.
Ensinu superiór tantu públiku no privada sira hamutuk 18, kompostu hosi Institutu Politékniku Betanu (IPB), Institutu João Saldanha (JSI, sigla ingles), Institutu Boaventura Timor-Leste (IBTL), Institutu Kafé Timor-Leste (ETCI, sigla ingles), Institutu Filozofia Francisco de Sales (IFSFS), Institutu Siénsia Relijioza (ICR), Institutu São João Brito (ISJB), Institutu Siénsia Saúde (ICS), Institutu Katólika Formasaun Profesór (ICFP), Institutu Superiór Kristal (ISC), Dili Institute of Technology (DIT), Institute of Business (IOB), Institutu Superiór Filozofia no Teknolojia (ISFIT), Universidade Dili (UNDIL), Universidade Oriental Timor Loro-sa’e (UNITAL), no Universidade da Paz (UNPAZ), UNTL no Institutu Profisionál Canossa (IPDC).
Enkuantu, programa prioridade MESSK iha tinan 2024 hanesan komisaun koordenadora, baze dadus ba ensinu superiór sira, sistema nasionál kualifikasaun ne’ebé Ministériu serbisu hamutuk ho Sekretaria Estadu Formasaun no Empregu (SEFOPE) hodi atribui diploma ba joven sira bazeia ba kompeténsia ne’ebé iha, no kurríkulu ba ensinu superiór.
Durante sesaun KRO, entidade sira hosi MESSK la husu orsamentu adisionál tanba orsamentu ne’ebé alokadu sufisiente.
Jornalista : Antónia Gusmão
Editora : Julia Chatarina
