DILI, 11 jullu 2023 (TATOLI) – Ministru Edukasaun Superiór, Siénsia no Kultura (MESSK), José Honório Jerónimo, iha ona planu atu kria Lei Baze Ensinu Superiór hodi garante kualidade iha ensinu refere.
“Iha planu ba tinan lima nia laran ne’e, ita sei kontinua diskute atubele hatuur Lei Baze Ensinu Superiór ida ho di’ak no loloos hodi garante kualidade ba ita-nian Instituisaun Ensinu Superiór Públiku no Privadu [IESPP] sira hodi kontrola mós atividade kampus paralelu sira” José Jerónimo hato’o iha Balide.
Tuir nia, mandatu IX Governu ne’e atu foku ba serbisu hodi hatuur fali órgaun Estadu ida ne’e iha nia fatin ho loos. Ne’e duni planu no prioridade ne’ebé MESSK iha mak atu garante kualidade ensinu superiór sira ne’ebé maka eziste iha nasaun ne’e, liuliu ba sira ne’ebé mak hetan ona akreditasaun.
“Saida maka MESSK tau ona nu’udar asuntu prioridade hodi hetan atensaun maka’as maka buka atu akompaña kritéria graduasaun ba estudante sira ne’e apár duni ho padraun ne’ebé maka Ministériu Edukasaun Ensinu Superiór fó sai ka la’e?”, nia tenik.
Aleinde ne’e sei observa ezisténsia klase paralela ka kampu ramu sira ne’ebé ensinu superiór sira kria iha kada munisipiu ne’e prienxe duni kritériu ka la’e. Bainhira sira la prienxe padraun ne’ebé MESSK fó sai tenke hapara sira-nian atividade akadémika.
Ba José Jerónimo, universitáriu sira ne’ebé estuda iha kampus paralelu ka ramu ne’ebé ensinu superiór sira kria ne’e atu garante futuru no loke dalan ba estudante sira atu aprende siénsia ida ho di’ak atu lori sira sai kualidade, maibé kampus ida maka la garante kualidade ba estudante sira di’ak liu taka.
Nia sei husu ba diresaun ne’ebé serbisu atende ba legalizasaun diploma estudante ensinu superiór sira husi rai-li’ur tenke kontrola ho didi’ak nia orijinalidade.
“Ha’u sei hasai sirkulár ida atu kontrola dokumentu sira ne’ebé maka estudante timoroan sira husi rai-li’ur lori mai atu hetan legalizasaun iha ministériu ne’e atubele identifika dokumentu sira ne’e karik la’ós orijinál ka konsidera falsu labele simu”, katak.
Tanba ne’e, iha loron 120 nia laran ministériu sei esforsu hodi halo diskusaun ho tékniku sira atu aselera ona asuntu prioridade ne’ebé maka hato’o ona hodi bele kria Lei Baze Ensinu Superiór ne’e atu sai matadalan ida hodi IESPP sira bele kumpre.
Jornalista: Tomé Amado
Editora: Maria Auxiliadora
