Eleisaun suku laiha tinta, eleitór sira bele vota doubru
OÉ-CUSSE, 10 novembru 2023 (TATOLI) – Kandidatura sira hosi suku Costa, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), preokupa ho eleisaun ho eleisaun suku ne’ebé laiha tinta, tanba eleitór sira bele vota doubru iha eleisaun ne’e.
Notísia relevante: Eleisaun suku ho sistema manuál, MAE sei hadi’a iha segunda ronda
Kandidatura xefe suku Costa, Aleixo Abi, hato’o nia preokupasuan ne’e, iha enkontru avaliasaun ne’ebé dirije hosi Vice-Prezidente CNE, Domingos Bareto no Diretór Jerál Desentralizasaun Governu Lokál iha Ministériu Administrasaun Estatál (MAE), António Guterres, iha salaun CNE Oé-Cusse, sesta ne’e.
“Eleisaun ikus ne’e laiha tinta atubele prepara, bainhira ita hotu hatudu sinál iha liman fuan, dalaruma ema bele vota dalarua, tanba atendimentu manuál, hakerek ho liman de’it, eleisaun primeiru eleitór vota iha kada aldeia maibé segunda volta vota livre hosi aldeia seluk bele vota ba aldeia seluk, ida-ne’e bele akontese ema ida bele vota dalarua, tanba laiha sinál tinta iha liman fuan,” Aleixo Abi, ko’alia iha enkontru avaliasaun ne’e.
Nia informa, eleitór iha suku Costa barakliu kompara ho suku seluk, tanba iha aldeia lima, ho totál eleitór 9.706, no aldeia rua iha área rurál, agora atu hakat ba eleisaun volta daruak, lahanesan volta dahuluk.
Iha aldeia Lakufoan eleitór 626, aldeia Mahata eleitór 1.161, aldeia Oésono eleitór iha 1.395, aldeia Oétfo iha 614.
“Maibé aldeia Sananen mak barakliu tanba iha eleitór 5.910 labele hotu iha loron ida, hosi dadeer to’o lokraik, iha primeira volta barak la vota, tanba meza ida de’it, maibé ami husu liuliu tinta, ne’e mak ita hatene katak, ema ne’e vota ona,” nia fó hanoin.
Notísia relevante: MAE no CNE rekoñese eleisaun suku volta dahuluk akontese erru barak
Iha fatin hanesan, kandidatura xefe suku Costa, Francisco Colo, hateten, eventu ne’e nu’udar komunitáriu ninian, maibé haree nia balansu ladún toma atensaun hosi parte kompetente, tanba eleisaun hotu-hotu, realiza iha Timor-Leste ba nesesidade interese nasionál RDTL nian.
“Ezemplu, eleisaun prezidensiál no eleisaun parlamentár, ida-ne’e hetan atensaun másima hosi diresaun kompetente sira, maibé to’o fali eleisaun lideransa komunitáriu ne’ebé maka besikliu komunidade maibé ladún toma atensaun hosi parte kompetente,” nia katak.
Tanba atu lidera meza, ne’e pertense komunidade rasik, hosi parte CNE só partisipa atu observa de’it no servisu téknika STAE mós hanesan.
“Ami husu de’it sé bele, toma atensaun ba sira-ne’e lidera meja eleisaun ho kondisaun ne’ebé di’ak, presiza bee-moos atu hemu karik fasilita netik ba, tanba atendimentu hotu-hotu manuál presiza tempu naruk, maibé kria mós kondisaun ba sira-nia saúde,” nia hateten.
Hatán ba rekomendasaun sira-ne’e, Diretór Jerál Desentralizasaun Governu Lokál hosi MAE, António Guteres, esplika, dekretu governu númeru 4/2016 hateten, tinta sei laiha, dekretu ne’e implementa ba xefe suku sira-ne’ebé nia mandatu remata.
“Maibé sei ema ruma gosta fila ba mai, halo votasaun dalarua, ne’e tama ona krime eleitorál, kódigu penál Timor-Leste, númeru 229 to’o 242 ne’e regula ba ida-ne’e, ne’ebé kuandu iha eleisaun haree, labele nonok, halo keixa kedas ba meja karik halo reasaun husu apoia seguransa, tanba prezensa PNTL iha sentru votasaun idak-idak atu asegura eleisaun ne’e tenke la’o ho di’ak,” nia informa.
Noisia relevante: Votu lato’o 50%+1, suku sia iha Oé-Cusse avansa ba segunda volta
Jornalista: Abílio Elo Nini
Editór: Evaristo Soares Martins
