MAE no CNE rekoñese eleisaun suku volta dahuluk akontese erru barak
OÉ-CUSSE, 10 novembru 2023 (TATOLI) – Governu liuhosi Ministériu Administrasaun Estatál (MAE) no Komisaun Nasionál Eleisaun (CNE, sigla portugés), rekoñese realizasaun eleisaun órgaun suku iha volta dahuluk akontese erru barak.
Tan ne’e iha loron sesta ne’e, CNE ho MAE hala’o enkontru ofisiál ho entidade sira hotu iha rejiaun Administrativa Espesiál Oé-Cusse Ambeno (RAEOA) hodi avalia lala’ok eleisaun órgaun suku primeira volta nian.
Notísia relevante: Eleisaun suku ho sistema manuál, MAE sei hadi’a iha segunda ronda
Diretór Jerál Desentralizasaun Governu Lokál hosi MAE, António Guteres, reforsa-tán liuhosi avalizasaun maka bele rekoñese buat-ne’ebé akontese iha pasadu hodi transforma ba prezente no hadi’a ba futuru.
“Ohin ita halo avaliasaun ba erru, obstákulu no dezafiu ruma ne’ebé iha, no akontese ona iha eleisaun dahuluk, ita bele konsidera buat hirak-ne’e, teknikamente ita bele hadi’a imediata iha elesiaun segunda volta mai, politikamente ita rekoñese buat ne’ebé akontese iha passadu hodi transforma ba prezente no hadi’a ba futuru mai,” nia katak.
Tuir nia, obstákulu sira-ne’e hotu la’ós hadi’a imediata iha prezente ne’e, tanba kestaun balu liga ho tékniku, nu’udar erru umanu bele hadi’a, maibé kestaun ba enkudramentu legál, presiza tempu no halo estudu, rekolla informasaun edekuadu hodi sai referénsia ne’ebé iha, atu hadi’a iha futuru.
Vise-Prezidente CNE, Domingos Barreto, esplika, enkontru avaliasaun ne’e ho objetivu atu haree fila-fali, saida mak naksalak iha eleisaun suku primeira volta, realiza iha loron 28 novembru 2023.
Nune’e liuhosi enkontru avaliasaun ne’e persiza rona sujestaun no rekomendasaun sira hosi entidade hotu, bainhira halo alterasaun ba lei númeru 9/2016, Lei Suku nian, lejisladór sira bele ajusta preokupasaun autoridade sira-nian.
Vice-Prezidente CNE, Domingos Barreto, hateten, nu’udar Komisaun Nasionál Eleisaun, rekoñese, iha eleisaun suku primeira volta, problema barak akontese, tan ne’e CNE ho nia inisiativa hodi hala’o enkontru ne’e ho tempu limitada, atu tau hanoin hamutuk haree ba futuru, problema, lakuna sira-ne’ebé iha pasadu, atu hadi’a di’akliu tan iha eleisaun tuir mai.
“Ohin ita hotu iha ne’e loke oportunidade atu hato’o hanoin sira, la’ós hatudu liman ba malu no fó sala ba parte ida, maibé presiza ita hotu nia opiniaun atu hato’o ba Governu hodi buka solusaun, tanba rai ne’e ita hotu nian, la’ós iha CNE no STAE nia liman, maibé to’o iha autoridade suku sira, saida mak sala iha pasadu, ita hotu mak buka atu hadi’a, ne’e ita hotu nia responsabilidade,” Domingos Barreto, ko’alia iha ámbitu avaliasaun ne’e.
Nia argumenta, lei númeru 9/2016, mosu ho lakuna balu maibé la regula iha lei ne’e, rejime jerál iha kódigu sivíl, bele aplika ba terrtóriu nasionál, tan ne’e saida maka akontese iha pasabu, tenta buka atu hadi’a ba futuru.
Notísia relevante: Votu lato’o 50%+1, suku sia iha Oé-Cusse avansa ba segunda volta
Entretantu, tuir kalendáriu eleisaun suku segunda volta sei akontese iha semana oin, loron 13 novmebru 2023.
Hola parte iha sesaun avaliasaun ne’e mai hosi kandidatura xefe suku sia (9) ne’ebé avansa eleisaun orgaun suku segunda volta, prezidente asembleia suku no aldeia sira, sosiedade sivíl, observasaun nasionál no rejionál, PNTL no F-FDTL inklui jestór sub-rejiaun Oésilo, Pássabe, Nítibe no Pante Makasar.
Notísia relevante: FRETILIN husu Governu hadi’a mekanizmu eleisaun suku iha segunda ronda
Jornalista: Abílio Elo Nini
Editór: Evaristo Soares Martins
