DILI, 10 novembru 2023 (TATOLI)–Sekretáriu Estadu ba Veteranu (SEV), Cesár dos Santos da Silva, hateten konstrusaun monumentu 12 novembru iha simetériu santa crús tarde tanba projetu no konstrusaun ne’e iha fali semitériu públiku nia oin.
“Ita-nia ministru halo ona enkontru ho empreza kontratór ne’e no sira aprezenta sira-nia difikuldade lubuk ida-ne’ebé merese ita tau konsiderasaun. Premeiru, difkuldade ne’e halo loos iha semitériu públiku nia oin. Agora, kondisaun ne’ebé eziste iha santa crús ne’e mak difikulta prosesu konstrusaun nian,” Governante ne’e hateten ba Agência Tatoli iha nia kna’ar fatin, Caicoli, sesta ne’e.
Tuir nia, iha simetériu públiku Santa Crúz ne’e iha rate balun ne’ebé presiza tenke sobu hasai mak bele aselera konstrusaun ne’e, maibé atu sobu rate balun ne’e mós tenke koordena ho parte relevante nune’e labele kria problema.
“Presiza sobu buat balun iha simetériu santa crús ne’e, nune’e bele aselera. Tanba ida-ne’e mak prejudika prosesu ne’e. Maibé, ita mós hanoin tenke koordena ho parte relevante (rate na’in) atu bele sobu. Tanba iha ne’ebá rate lubun ida mak taka espasu no kruza malu entaun oinsá buka dalan atu bele sobu. Ida-ne’e mak sai difikuldade ba progresu projetu nian,” nia dehan.
Governante ne’e esplika, atu solusiona ne’e mak tenke koordena ho órgaun kompetente hafoin mak buka solusaun, tanba kuandu rate iha dalan ne’e empreza kontratór labele sobu no labele halo konstrusaun.
Kona-ba prosesu halo estatua memoriál 12 novembru nian iha Portugál, nia dehan, ida-ne’e Prezidente Komité 12 Novembru 1991, Gregório Saldanha, mak bele esplika asuntu ne’e.
Konstrusaun memorial 12 novembru hahú konstrui iha tinan 2021 maibé la konsege finaliza no Governu anteriór prolonga tan tinan ida mai to’o 2023 maibé nafatin laiha progresu.
Empreza kontratór ne’ebé konstrui monumentu 12 novembru ne’e mak empreza Bobolait, Lda, ho osan montante millaun $1.3 ($1.385.389,88).
Notísia Relevante: Estátua ba monumentu 12 Novembru prosesa hela iha portugál
Jornalista : Osória Marques
Editór : Cancio Ximenes
