VIQUEQUE, 12 novembru 2023 (TATOLI)—Veteranu postu administrativu Uatulari, Moises da Silva “Berekoko”, hateten komemorasaun masakre 12 novembru ba dala-32 ne’ebé refleta akontesimentu masakre 12 novembru 1991 iha semitériu Santa Crus ne’e, sai hanesan odamatan ba ukun rasik aan.
Notísia Relevante: Masakre 12 Novembru hanesan fatór determinante loke mundu nia matan
“Ita hotu hatene akontesimentu 12 novembru ita-nia joven barak mak lakon vida. Loron 12 novembru sai odamatan ba Timor-Leste hodi restaura ninia independénsia. Nune’e, jerasaun foun sira tenke buka hatene tanba saida mak akontese masakre 12 novembru ne’e mosu lori joven mate barak ne’e, husu ba ita ida-idak ninia aan,” Moises da Silva “Berekoko” hateten hafoin ramata sunu lilin no kari aifunan iha krús boot, Uma Mahon, Uatulari, domingu ne’e.
Veteranu ne’e hatutan, iha tinan ida-ne’e Viqueque mak sai responsavél ba komemorasaun masakre 12 novembru, tanba Viqueque oan ida mak mate iha iha igreja Motael iha 28 outubru 1991, no bainhira atu kari aifunan midar iha simetériu Santa Crúz, Dili, mak hodi hamosu masakre ne’ebé lori joven barak mak mate no balun hetan kanek.
“Maibé, ita Uatulari la sente no agora daudaun sobrevivente hosi postu Uatulari nian hela uitoan mak sei hela Uatulari, barak hela iha Dili, la iha sentimentu atu mai fali nia rain rasik hodi halo buat ruma. Tan ne’e, ha’u hakarak husu ba inan-aman Uatulari tenke akompaña ita-nia joven sira hodi envolve sira iha prosesu dezenvolvimentu,” nia sujere.
Aleinde ne’e, nia husu ba veteranu, inan-aman no joven sira iha Uatulari bainhira selebra loron istóriku sira, populasaun postu Uatulari tenke partisipa tanba dala barak halo komemorasaun ema partisipa mínimu tebes.
Notísia Relevante: Sé Mak Responsabiliza? Xanana Gusmão!
“Ha’u hakarak mós husu ba abitante sira liu veteranu no inan-amán sira iha Uatulari, bainhira ita halo komemorasaun loron boot ruma iha ne’e tenke partisipa tanba dala barak ita halo komemorasaun ema partisipa menus liu. Selebrasaun loron istóriku sira-ne’e sai importante ba ita hodi refeleta ba pasadu uluk ita hasoru no agora ita hetan ona vitória, ita tenke hamutuk hodi festeza,” nia dehan.
Adiministradór postu Uatulari, Manuel do Rosário, hateten liuhosi prosesu luta naruk hafoin Timor-Leste hetan ninia independénsia no atu hetan independénsia ema barak mak lakon vida no balun hetan troturasaun.
Tanba ne’e, nia husu ba joven sira agora nian ne’e tenke aproveita tempu hodi buka matenek atu bele kontribui ba dezenvolvimentu Timor-Leste nian.
“Ita hetan liberdade ema barak mak lakon vida no balun hetan troturasaun hosi invazór sira. Tempu agora joven sira tenke aproveita ho di’ak buka matenek hodi kontribui ba dezenvolvimentu. Joven sira tenke kria pás no establidade, labele kria violénsia,” nia dehan..
Notísia Relevante: Amali: “Kalma no Auguenta Oituan Ba!”
Jornalista : Vitorino Lopes da Costa
Editór : Cancio Ximenes
