Lú Olo preokupa konstrusaun monumentu 12 Novembru laiha progresu

DILI, 12 novembru 2023 (TATOLI)–Eis Prezidente Repúblika, Francisco Guterres Lú Olo, konsidera konstrusaun monumentu 12 novembru iha simetériu Santa Krús laiha progresu tanba tinan rua resin ona maibé seidauk konklui.
Notísia Relevante: Estátua ba monumentu 12 Novembru prosesa hela iha portugál
Nia hateten, tuir loloos obra monumentu masakre 12 novembru ne’e konklui tiha ona tanba ninia durasaun tempu tinan rua liu ona, agora kestaun saida mak obra ne’e la la’o ne’e Governu tenke husu kompañia Bobolait ninia responsabilidade.

“Ha’u hanoin Estadu ka Governu tenke husu responsabilidade ba kompañia ne’ebé kaer obra ne’e, tanba saida mak to’o agora konstrusaun ne’e seidauk ramata. Tanba, kalén kazinku ne’ebé halo didin durante tinan rua resin ne’e mak sei kontinua nafatin hela iha imetériu oin ne’e,” Lú-Olo hateten ba jornalista sira bainhira partisipa komemorasaun masakre 12 novembru ba dala-32 iha simetériu Santa Crús, domingu ne’e.
Vise Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino, hateten asuntu kona-ba konstrusaun monumentu masakre 12 novembru ne’e, nia sei toma responsabilidade atu aselera prosesu ne’e.
“Ha’u husu ba komité 12 Novembru, karik ita-boot sira hakarak atu halo konfirmasaun kona ba asuntu ne’e, ha’u disponivel nafatin tempu atu ko’alia ho ita-boot sira. Maske tempu feriadu, ita-boot sira hakarak hasoru ha’u, ha’u prontu atu atende hodi nune’e ita bele aselera prosesu ne’e,” nia hateten.
Konstrusaun monument 12 novembru ne’e kle’ur ona tanba kuaze tinan rua resin ona halo ambiente iha simetériu oin ne’e ladún furak no dala barak hamosu engrafamentu, tanba ne’e Governu tau ona importánsia ba asuntu ne’e no sei halo esforsu hodi aselera obra ne’e.
Notísia Relevante: Bobolait prontu aselera konstrusaun Monumentu 12 Novembru maibé orden projetu tarde
Jornalista : Tomé Amado
Editór : Cancio Ximenes

