PR Horta apoia desizaun Governu suspende atividade GAM no GAR
DILI, 13 novembru 2023 (TATOLI)—Prezidente Repúblika (PR), José Ramos Horta, apoia desizaun IX Governu Konstitusionál ne’ebé atu suspende atividade Grupu Arte Marsiál (GAM) ho Grupu Arte Rituál (GAR).
Notísia Relevante: Governu sei foti desizaun importante kona-ba arte marsiál-rituál iha reuniaun KM
“Kualkér desizaun Primeiru-Ministru no Konsellu Ministru deside, ha’u apoia. Ne’e desizaun, ha’u apoia nune’e fó oportunidade ba líder arte marsiál sira sensibiliza sira-nia membru labele halo violénsia. Se fulan neen nia laran buat hotu hakmatek, Governu sei foti ka dada fali bandu ne’e, maibé tenke haree liuliu ba problema ne’e nia hun no abut,” PR Horta hateten ba jornalista sira iha Metiaut, segunda ne’e.
Arte marsiál ne’e, nia dehan, tenke tenke sukat didi’ak tanba elementu sira-ne’e tanba sira ida-idak rasik mak halo la’ós organizasaun arte marsiál mak halo, tanba sira hola parte iha komunidade.
Joven lubun ida hola parte iha grupu arte marsiál maibé la signifika organizasaun ne’e mak responsável, entaun líder sira organizasaun arte marsiál sira tenke kontrola sira-nia membru sira ho didi’ak.
“Membru sira-ne’e la’ós hanesan hela iha kuartél ida, ida-idak hela iha nia uma iha aldeia no suku keta-ketak. Dalaruma tanba problema familiár, kazamentu nian depois klaru bolu malu membru arte marsiál, entaun probelma aumenta, Ne’eduni, ha’u hanoin tenke sukat didi’ak, se problema ne’e solusaun taka ka lae maibé kualkér desizaun Primeiru-Ministru no Konsellu Ministru dside, ha’u apoia,” nia hateten.
Xefe Estadu husu ba Polisia Nasionál Timor-Leste (PNTL) atu asegura seguransa ba komunidade tenke bazeia ba lei no orden.
“Polísia bara-barak loos, apoiu orsamentu polísia nian aas tebe-tebes. Maibé, probelma akontese beibeik, membru polísia mosu la halo buat ida. Ha’u simu WhatsApp lubun ida hosi komunidade hosi fatin sira hateten polísia na’in-rua mai maibé sira ba tiha la halo buat ida, mai hare de’it,” nia dehan.
Nune’e tenke hare didi’ak ho komandu PNTL tanba PNTL nia papél mak prevensaun falla, entaun atuasaun makaas hodi fó protesaun ba komunidade.
Tuir rezolusaun Governu númeru 45 /2023, 10 novembru, determina suspensaun kona-ba ensinu aprendizajen no prátika arte marsiál ho adosaun medida hodi asegura orden públika.
Konsidera insidente todan boot sira-ne’ebé rejista iha loron hira nia laran foin daudaun ne’e iha fatin keta-ketak iha territóriu nasionál, ne’ebé envolve elementu arte marsiál sira-ne’ebé pertense ba grupu arte marsiál.
Ida-ne’e konsidera katak hosi totál inisidente 54 ne’ebé rejista, ema sira-ne’ebé mate hamutuk na’in-haat (4) no kanek todan na’in-26 ho tan danu ka estragu ba sasán hanesan uma 21 no veíkulu (kareta no motor) 10.
Eventu sira hanesan ne’e provoka iha komunidade ne’ebé afetada nia sentimentu hanesan insegurasa, no ida-ne’e hanesan ameasa ne’ebé boot ba estabilidade no seguransa públika iha nasaun.
Tuir Lei númeru 5/2017, 19 abril, prevee ona katak ensinu, aprendizagem ho prátika arte marsiál no loke sentru, klubu ka eskola hodi prátika atividade hirak ne’e depende ba autorizazahn prévia.
Nune’e determina suspensaun kona-ba ensinu, aprendizajen ho prátika arte marsiál no prátika arte rituál iha territóriu nasionál tomak ba períodu fulan neen.
Notísia Relevante: PNTL hahú investiga konfrontu Lourba no Carabau
Jornalista : Nelson de Sousa
Editór : Cancio Ximenes
