BOBONARO, 14 novembru 2023 (TATOLI) — Sekretariadu Tékniku Administrasaun Eleitorál, Munisípiu Bobonaro, fó-sai katak, prosesu Eleisaun Suku volta daruak, iha suku Molop, postu administrativu Bobonaro hatudu rezultadu hosi kandidatu na’in-rua empata.
Diretór STAE Munisípiu Bobonaro, Mariano Viegas Amarál, atualiza prosesu eleisaun xefe suku segunda volta, iha suku Molop, hatudu rezultadu impata, tanba bazea ba rezultadu apuramentu suku, kandidatu Almerio de Jesús no António Maia hetan votu válidu hanesan ho totál 337.
Notísia relevante: Partisipasaun eleisaun suku volta daruak iha aldeia Ritabou menus
“Ita iha suku ida maka kandidatu na’in-rra ne’e nia votu válidu hansan, entaun ita bele dehan impata iha suku Molop, ita koordena ona ho Diresaun Jerál no Prezidente Autoridade fó hatene mós diresaun jerál governasaun lokál, tanba ne’e ita hein desizaun atu iha terseira ronde ka atu dehan re-eleisaun ga. Ida-ne’e desizaun hosi sentrál, ita hein hela orientasaun,” nia ko’alia iha Maliana, tersa ne’e.
Ne’e duni, STAE Munisípiu Bobonaro no Komisaun Nasionál Eleisaun (CNE, sigla portugués), Polísia Nasionál Timor-Leste, Autoridade Munisípiu Bobonaro no administradór postu administrativu Bobonaro kontinua preparadu atu realiza eleisaun suku ba eleisaun impata iha suku Molop.
“Ita halo tuir mai to’o oras ne’e seidauk iha orden servisu ruma atu realiza atividade eleisaun empata iha segunda ronde,” nia katak.
Tuir observasaun hosi STAE katak prosesu eleisaun suku segunda volta ne’e to’o apuramentu suku la’o ho di’ak, tanba la simu keixa no reklamasaun ruma hosi eleitór sira.
Maibé nia dehan, iha kandidatu xefe suku hosi postu administrativu Atabae mak la satisfaz ho rezultadu kontajen votu iha sentru votasaun, tanba iha momentu kontajen votu iha sede aldeia nia rasik la partisipa no nia husu ba meza asembleia aldeia atu halo kontajen votu repete.
“Ha’u hateten tuir lei ne’e kontajen inisiál ne’e hala’o iha sentru votasaun, maibé to’o suku ne’e halo apuramentu de’it ona, laiha ona halo kontajen repetidu, sé ita-boot sira la simu no la aseita karik, bele halo keisa ka reklamasaun depois mak meza asembleia aldeia la konsege rezolve, bele kontinua ba iha postu administrativu ka señor administrador sira haree hamutuk ho meza asembleia suku,” nia esplika.
Munisípiu Bobonaro iha suku 50, iha suku 49 maka re-eleitu no eleitu ona hosi número okupa feto ida sai xefe suku Leo-hitu, postu administrativu Balibo ba períodu 2023-2030.
Notísia relevante: Eleisaun segunda volta: la’ós Ramos Horta maibé povu TL mak manán
Jornalista: Sérgio da Cruz
Editór: Evaristo Soares Martins
