iklan

POLÍTIKA

PN aprova proposta hasai lejitimidade Xefe Estadu rai-li’ur iha projetu-lei indultu

PN aprova proposta hasai lejitimidade Xefe Estadu rai-li’ur iha projetu-lei indultu

Prezidente Parlamentu Nasionál, Maria Fernanda Lay. Imajen/TATOLI

DILI, 15 novembru (TATOLI)—Parlamentu Nasionál (PN) aprova proposta hosi Deputadu bankada opozisaun ne’ebé husu atu hasai lejitimidade Xefe Estadu rai-li’ur ho xefe misaun diplomátika iha projetu-lei númeru 5/2016, 25 maiu, kona-ba Prosedimentu Konseisaun Indultu no Komutasaun Pena.

Notísia Relevante: FRETILIN kontra totál projetu alterasaun lei indultu

Liuhosi reuniaun plenária extraordinária, kuarta ne’e, iha diskusaun finál globál ba projetu alterasaun ba lei númeru 5/2016, 25 maiu, kona-ba Prosedimentu Konseisaun Indultu no Komutasaun Pena, iha rekerimentu reabertura ba plenária ba pedidu proposta hamutuk lima hosi Deputadu bankada opozisaun ba iha meza, nune’e prosede ba votasaun pasa hodi loke ba debate kada proposta.

Proposta  opozisaun hosi Deputadu FRETILIN, Joaquim dos Santos ho Deputadu KHUNTO, António Verdial de Sousa, ne’ebé hetan aprovasaun hodi husu hasai tiha artigu 5 ‘Lejitimidade’ ba Xefe Estadu nasaun seluk ka rai-li’ur no xefe misaun diplomátika akreditadu iha país ne’ebé bele husu rekerimentu indultu ka komutasaun pena ou medida seguransa, ne’ebé tau iha projetu-lei ne’e.

“Rezultadu votasaun ba proposta númeru 4, rezultadu votasaun a-favór 60, kontra  rua (2) no abstensaun 0, nune’e pasa,” Prezidente Parlamentu Nasionál, Maria Fernanda Lay, hateten iha sala plenária PN.

Ho aprovasaun proposta ne’e mak iha artigu inisiál iha projeitu-lei ne’e sei hasai.

Deputadu proponente, Joaquim dos Santos, hateten PN konsege simu sira-nia proposta katak iha lei indultu ne’e labele loke marjen interferénsia Xefe Estadu rai seluk ka ninia misaun diplomátika atu hetan lejitimidade hosi lei atu aprezenta rekerimentu.

“Nune’e, Parlamentu maiória la konkorda ida-ne’e. Sira aprova katak, la presiza tau iha lei, maibé regula de’it nia prosedimentu tomak dezde sira uza sira-nia reprezentante legal. Ne’ebé, se sidadaun estranjeiru ruma mak hetan kondenasaun iha ita-nia rai-laran la’ós automátikamente Xefe Estadu ka xefe misaun diplomátika ba hasoru  diretamentu Prezidente Repúblika, tanba nia iha lejitimidade ho lei. Maibé. Ohin, ita aprova ne’e sira bele liuhosi xefe misaun diplomátika sira uza sira-nia kompeténsia, nune’e aprezenta reprezentante legál ko’alia reprezenta kondenadu,” nia hateten.

Nune’e, nia dehan, evita labele iha intervensaun titulár nasaun seluk ba sistema justisa Timor-Leste nian no halo mós protesaun ba Prezidente Repúblika Timor-Leste hanesan titulár Estadu.

Deputadu PD, António da Conceição ‘Kalohan’, hateten proposta ne’e lori hanoin situasaun oioin ne’ebé tenke konsidera, no Deputadu proponente iha razaun hato’o kona-ba defende direitu sidadaun no labele halo aktu estranjeiru ho sentidu defende soberania

Prezidente Komisaun A trata asuntu Justisa no Konstituisionál, Deputadu Patrocínio dos Reis Fernandes, hateten ba proposta ida-ne’e nu’udar proponente ba projetu-lei ne’e, katak iha  momentu debate espesialidade iha komisaun, hanoin katak atu tau Xefe Estadu ou reprezentante estranjeiru ladún iha implikasaun jurídika maibé implikasaun bele diskute kle’an.

“Karik diskute iha komisaun tempu limitadu, entaun iha plenária ne’e ita hotu-hotu bele diskute hodi prodús. Lei nakloke, hotu-hotu debate atu pondera didi’ak,” nia dehan.

Deputada PLP, Maria Angelina Sarmento, hateten kona-ba proposta ne’e hanoin iha razaun atu aseita ka a-favór hodi hasai tiha.

Sira-ne’ebé rekere indultu Xefe Estadu Estranjeiru no xefe misaun diplomátika, tanba ko’alia kona-ba defende soberania ne’e, prosesu indultu sira haree krime nia gravidade.

Deputadu KHUNTO, António Verdiál, apresia Deputadu sira iha Parlamentu Nasionál tanba bele diskute ba proposta refere.

“Atan ha’u rasik sai mós hanesan proponente, perspetiva jurídika lei ne’e presiza pondera didi’ak. Hanesan vise Prezidente komisaun A, plenária presiza haree ho kuidadu, nune’e PN bele kria lei ida kredivel ba nasaun demokrátika no ita presiza komprende nasaun ne’e RDTL. Nune’e, presiza rona hadi’a kestaun ne’e,” nia dehan.

Ministru Justisa, Amandio de Sá Benevides, konsidera diskusaun deputadu sira-nian pertinente tebes, nune’e presiza haree didi’ak lejitimidade Xefe Estadu nasaun seluk no xefe misaun diplomátika, nune’e desizaun fila ba deputadu sira-nian.

Entertantu, iha reuniaun plenária ne’e PN mós aprova proposta Deputadu opozisaun FRETILIN, Joaquim dos Santos, ba artigu 9  ‘Desizaun’ indultu kona-ba pena feixada iha desizaun fiksada  iha desizaun tranzidu enjulgadu, nune’e parte proponente la aseita hosi husu hasai hosi projetu lei ne’e.

Enkuantu proposta tolu seluk la hetan aprovasaun ka la pasa mak hanesan artigu 11-A  ‘Kriteiru Konsesaun’,  artigu 11-B ‘Krime Insuscsetíveis Indultu’ no artigu 11-C ‘Data annual ba konsesaun indultu no komutasaun pena’.

Notísia Relevante: Projetu alterasaun lei indultu hein ajenda diskusaun iha plenária

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!