DILI, 15 novembru 2023 (TATOLI)–Sekretáriu Estadu Veteranu (SEV), Cesár dos Santos “Merak”, hateten ekipa verifikasaun halo verifikasaun ba dadus veteranu rejistadu 2009 ne’e sei ramata iha 30 novembru, maibé veteranu sira-ne’ebé la partisipa iha prosesu verifikasaun ne’e sei esklui.
Notísia Relevante: Membru PN preokupa verifikasaun dadus veteranu rejistadu 2009
Tuir kalendáriu, Governu liuhosi ekipa verifikasaun hosi Ministériu Asuntu Kombatente Libertasaun Nasionál (MACN, sigla postugés) halo verifikasaun hahú iha 28 setembru 2023 no sei ramata iha 30 novembru 2023.
“Atu hateten katak ami halo verifikasaun ba dadus 2009 nian ne’e, ba dadus restu hela 25% ne’e. Maibé, tuir partisipasaun veteranu iha terrenu ne’e sei la konklui 100% hosi 25% ne’e, tanba ema barak mak lakohi hakbesik ba fatin rejistrasaun. Se ami hein to’o loron 30 novembru 2023 mak ami sei la loke tan rejistrasaun no sei la halo verifikasaun. Sira-ne’ebé la mai partisipa ne’e, ami sei esklui,” Cesár dos Santos “Merak” hateten ba Agência Tatoli, nia kna’ar fatin Caicoli, Dili, foin lalais ne’e.
Nia esplika, kombatente sira-ne’ebé mak la mosu iha fatin ne’e tanba de’it rejistadu 2009 nian ne’e halo verifikasaun iha tinan 2021, entaun ho tempu naruk ida-ne’e mak na’in sira mate tiha ona mak hodi la mosu.
Dalaruma, nia hateten, tanba juramentu antes halo verifikasaun tenke halo juramentu ne’e mak sai impaktu ida ba sira mak la mosu iha fatin, maibé bainhira verifikasaun ne’e ramata iha 30 novembru 2023 mak MACLN sei esklui ba sira-ne’ebé la mosu mai iha fatin rejistrasaun.
Membru Governu ne’e hateten, prosesu verifikasaun ba dadus veteranu rejistadu 2009 nian ne’e, MACLN valida ona 75% ne’ebé ekivale ba 93.000, hosi ema 124.680 no hela 25% ho ema 30.000 hanesan ne’e.
Ba kestaun ida-ne’e, nia dehan, tanba Prezidente Repúblika promulga ona Orsamentu Retifikativu mak ekipa verifikasaun hahú halo verifikasaun dadus veteranu 2009 iha setembru fulan kotuk.
Maibé, nia dehan, iha atividade ekipa verifikasaun ba dadus veteranu rejistadu 2009 iha territóriu nasionál ne’e, munisípiu hitu (7) mak konklui ona.
“Agora daudaun atividade halo verifikasaun ba dadus veteranu ne’e la’o hela iha munisípiu. Munisípiu hitu ne’ebé verifikasaun konklui ona mak Manatuto, Lautém, Viqueque, Bobonaro, Manufati, Ermera no RAEOA, Signifika sei falta munisípiu hitu mak verifikasaun ne’e seidauk ramata,” nia dehan.
Iha munisípiu Aileu, nia dehan, ekipa verifikasaun daudaun ne’e halo verifikasaun dadus veteranu rejistadu 2009 ne’e tama ona ba postu administrativu Remexio no sei ramata iha 30 novembru 2023.
Iha Ainaro, ekipa verifikasaun halo hela verifikasau iha postu administrativu Maubisse no sei ramata iha 28 novembru 2023.
Iha munisípiu Baucau, ekipa verifikasaun halo hela verifikasaun ba dadus veteranu rejistadu 2009 iha postu administrativu Venilale ho Baucau Villa nian, no sei ramata iha 22 novembru 2023.
Iha munisípiu Dili, ekipa ferifikasaun halo hela verifikasaun ba dadus veteranu rejistadu 2003 iha postu administrative Nain Feto no sei konklui iha munisípiu Ataúro iha 28 novembru 2023.
Iha muisípiu Liquiça, ekipa verifikasaun halo verifikasaun ba dadus veteranu rejistadu 2009 iha Liquça Vila no sei konklui iha iha 28 novembru 2023.
Liuhosi konteúdu ne’ebé mensiona iha Estatutu Kombatente Libertasaun Nasional, lei númeru 3/2006, no artigu 13 hateten Registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekoñesimentu Kombatente hanesan Libertasaun Nasionál ne’ebé rejista ha tinan 2009.
Jornalista : Osória Marques
Editór : Cancio Ximenes
