PNTL Oé-Cusse la rejista krime durante eleisaun órgaun suku
OÉ-CUSSE, 16 novembru 2023 (TATOLI) – Komandu Polísia Nasionál Timor-Leste (PNTL) iha Rejiaun Administrativa Espsiál Oé-Cusse Ambeno (RAEOA), la rejista krime no asidente ne’ebé akontese iha realizasaun eleisaun órgaun suku, hahú hosi volta dahuluk 28 outubru mai to’o volta daruak 13 novembru 2023 ne’e.
Notísia relevante: PNTL Oé-Cusse sei la fó espasu ba individu tenta instabiliza Eleisaun Suku
“Eleisaun órgaun suku hahú hosi primeira ronde mai to’o segunda ronde, situasaun la’o kapaas no kontroladu, membru PNTL sira-ne’ebé koloka iha sentru votasaun sira hetan mós apoia hosi forsa destakdu sira hosi UPF, F-FDTL, BOP no Máritima,” Komandante PNTL RAEOA, Superintendente Nicolau Francelino da Costa, iha Oé-Cusse, kinta ne’e.
“Ne’ebé eleisaun hahú hosi primeira ronde mai to’o segunda ronde ne’e, PNTL nunka simu keixa ruma, informasaun kona-bá krime ruma, asidente no insidente ne’ebé maka akontese iha eleisaun órgaun suku,” nia afirma.
Tuir nia, sentru votasaun iha Oé-Cusse hamutuk 63, barak mak iha área rurál, fatin izoladu sira, prezensa PNTL iha fatin sira-ne’e, kuaze kobre hotu, atubele asegura no fó seguransa hodi garante eleisaun ne’e la’o ho susesu.
Maibé, nu’udar parte seguransa agradese ba povu Oé-Cusse, tanba iha kooperasaun di’ak, servisu hamutuk ho parte seguránsa no garante duni eleisaun iha Oé-Cusse la’o ho ambiente pas.
“Ida-ne’e hatudu katak, kooperasaun di’ak tebes entre komunidade ho seguransa nian, hodi hamtein pás no estabilidade, ida-ne’e Oé-Cusse hatudu ezemplu di’ak hahú hosi eleisaun dahuluk mai to’o volta daruak,” nia orgullu.
Notísia relevante: PNTL Oé-Cusse preparadu asegura Eleisaun Suku no garante la’o ho susesu
Jornalista: Abílio Elo Nini
Editór: Evaristo Soares Martins
