BOBONARO, 17 novembru 2023 (TATOLI)- Atu kontinua hametin rekonsiliasaun entre povu Timor-Leste no timoroan sira iha iha Nusa Tenggara Timur (NTT) Indonézia, Prezidente Repúblika (PR), José Manuel Ramos Horta, sei ko’alia ho Primeiru Ministru, Kay Rala Xanana Gusmão, atu halakon kanek pasadu ne’ebé akontese dezde tinan 1975 to’o 1999.
Xefe Estadu hato’o asuntu ne’e bainhira lansa atividade semináriu interkulturál ho tema ‘Husi Wehali to’o Modernu, Interasaun Sosiál, Kultura no Polítika Sosiedade illa Timor hosi tempu ba tempu’ ne’ebé realiza iha ámbitu eventu festivál fronteira 2023.
PR Horta hamutuk ho Primeiru Ministru Xanana Gusmão, ko’alia kleur ona atu timoroan ho timoroan sira iha Indonézia simu malu.
Notísia relevante: Rekonsiliasaun dalan úniku halakon diskriminasaun no hametin unidade nasionál
“Ita tenke taka duni prosesu 1975 to’o 1999, iha funu ruma, iha konflitu ruma,viha istória, ita la’ós haree hosi parte ida de’it mak halo sala, ha’u iha determinasaun ko’alia ho Maun Boot Xanana, atu taka prosesu hotu-hotu relasiona ho 1999 no 1975 nian,” nia hateten iha Jináziu Maliana, kuarta ne’e.
“Nu’udar ema, nu’udar sidadaun, idak-idak buka meiu hotu-hotu hodi hakle’an liután rekonsiliasaun, dame entre komunidade sira-ne’e,” nia apela
Biban ne’e, Horta agradese ba Sekretáriu Estadu Arte no Kultura no Sentru Nasionál Chega bele implementa atividade Festivál Fronteira ‘Interkambiu kulturál ba Hametin Rekonsiliasaun’, tanba liuhosi eventu ne’e bele hametin liután relasaun família no kultura entre povu rai rua.
“Inisiativa ida-ne’e importante tebes tuir polítika ida-ne’e, Primeiru Ministru Kay Rala Xanana Gusmão hahú iha 1999 to’o agora, ita tau ba kotuk, buat ne’ebé pertense ba kotuk, haree ba oin, uluk na’in rekonsiliasaun timoroan sira iha rai laran, liuliu normalizasaun relasaun ho Indonézia,” nia afirma.
Nia subliña, relasaun Timor-Leste ho Indonézia hanesan relasaun númeru um ba estadu Timor-Leste nia polítika externa.
Tanba nasaun rua iha fronteira ida, fronteira terrestre, marítima no espasu aéreu.
Notísia relevante: Relasaun família-kultura TL ho NTT laiha fronteira
Jornalista: Sérgio da Cruz
Editór: Evaristo Soares Martins
