BOBONARO, 20 novembru 2023 (TATOLI)-Vise Prezidente Konsellu Kombatentes Libertasaun Nasionál munisípiu Bobonaro, Lucio Diniz Márquez ‘Onsar’, informa Estadu sei kondekora kombatentes Libertasaun Nasioná hamutuk ema 201 iha Bobonaro iha loron 27 fulan-novembru 2023.
Nia esplika husi numeru kombatentes 201, sei kondekora ho grau ordem funu-na’in hamutuk ema sia, no ordem Nicolau Lobato, ema 192.
“Ita prepara kombantentes 201 ne’ebé dia 27 novembru loraik atu kondekora sira ho grau hanesan Grau 3 hotu. Atribuisaun ne’e ba kombantes sira ne’ebé merese hetan no kombantentes ne’ebé simu ona pensaun mais seidauk simu medalla,”Nia informa ba Jornalista sira iha kna’ar fatin Maliana, segunda ne’e.
Notisia Relevante:Loron 28 novembru marka povu TL deklara nia independénsia
Tuir loloos serimonia kondekorasaun ba Kombatentes Libertasaun Nasionál hosi munisípiu Bobonaro sei realiza iha serimonia komemorasaun 28 fulan-novembru 2023 maibé labele tanba iha komemorasaun ne’e sei hala’o tomada pose ba xefe suku foun sira ne’ebé eleitu iha munisípiu Bobonaro.
Nia dehan, kona-ba fatin serimonia ba kondekorasaun ne’e, komisaun organizadora seidauk deside tanba sei iha prosesu identifikasaun
“Fatin ne’e seidauk loos, foindadauk telefone ba nasionál atu iha munisípiu ka tanba iha ne’ebá destinadu iha munisípiu maibé so nasionál fó informasaun balun para atu bele haree situasaun,” nia hateten.
Tuir nia kondekorasaun ne’e parte ida atu Estadu rekoiñese luta na’in sira ne’ebé fó ona kontribuisaun ba prosesu luta ba ukun rasik aan.
Notísia Relevante:Veteranu na’in-628 sei simu kondekorasaun iha 28 novembru
Jornalista: Sergio da Cruz
Editór: Agapito dos Santos
