OÉ-CUSSE, 20 novembru 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) prevee orsamentu hamutuk rihun $4, hosi Orsamentu Jerál Estadu (OJE) 2023, hodi komemora loron Proklamasaun Unilaterál Independénsia 28 novembru 2023 sei realiza iha sub-rejiaun haat.
“Ita perpara rihun $4, orsamentu ne’e mai hosi RAEOA nian, ita sei fahe ba sub-rejiaun haat, Oésilo, Pássabe, Nítibe no Pante Makasar, atu ba komemorasaun 28 novembru, kona-bá tomada de pose Konsellu Suku sira, hosi nasionál apoia $1.800,” Prezidente Komisaun Organizadóra Martinho Abani Elo, informa, hafoin remata eskontru membru Autoridade iha Gabinete ZEESM Oé-Cusse, segunda ne’e.
Notísia relevante: Pose ba Konsellu Suku sira iha Oé-Cusse sei realiza kada sub-rejiaun
Atuál Sekretáriu Rejionál ba Asuntu Administrasaun ne’e, informa, orsamentu hirak-ne’e sufisiénte ba atendimentu iha loron nasionál ne’e, tanba desportu komunitáriu kansela ho razaun ajenda limitadu.
“Atividade sei laiha, tanba ajenda ba komemorasaun ne’e limitadu liu, ita selebra de’it loron nasionál ne’e, hosi parte komérsiu maka sei loke feira atu promove produtu lokál sira, maibé ba atividade desportu komunitáriu sei laiha,” Martinho Abani Elo, hateten.
Tuir nia, loloos iha desportu komunitáriu hanesan, sa’e-buah, dada-tali, halai karon, tata-berlindus, jogu foteból no volleibál, tanba atividade sira-ne’e kada tinan maka harame loron nasionál sira .
“Maibé depois enkontru koordenasaun iha Ministériu Administrasaun Estatál (MAE), kansela hotu tanba ajenda limitadu liu, tanba iha komeorasaun tinan iha ajenda prinisipál tolu, kondekora kombatente sira, pose ba Konsellu Suku sira no komemorasaun loron 28 novembru,” nia informa.
Notísia relevante: Kondekora kombatente 182 iha Oé-Cusse sei realiza iha 27 novembru 2023
Jornalista: Abílio Elo Nini
Editór: Evaristo Soares Martins
