HEADLINE, MUNISÍPIU, OÉ-CUSSE (RAEOA), POLÍTIKA

Pose ba Konsellu Suku sira iha Oé-Cusse sei realiza kada sub-rejiaun

Pose ba Konsellu Suku sira iha Oé-Cusse sei realiza kada sub-rejiaun

Sekretáriu Rejional ba Asuntu Administrasaun, Martinho Abani Elu. Imajen Tatoli/Abílio Elo Nini.

OÉ-CUSSE, 17 novembru 2023 (TATOLI) –  Prezidente Komisaun Organizadora ba komemorasaun loron proklamasaun 28 novembru  2023, Martinho Abani Elo, hateten, Governu sei pose Konsellu Suku sira iha Rejiaun Administrativa Espesiál Oé-Cusse Ambeno (RAEOA) sei realiza iha kada sub-rejiaun sira.

Notísia relevante: Xefe suku foun sei simu pose iha 28 novembru no simu motorizada foun iha 2024

Atuál Sekretáriu Rejionál ba Asuntu Administrasaun ne’e, informa, iha ámbitu enkontru preparasaun komemorasaun loron proklamasaun 28 novembru  2023, iha salaun administrasaun Numbei Oé-Cusse, sesta ne’e.

“Tomada depose Konsellu Suku sira, sei konsentra iha idak-idak nia sub-rejiaun, iha Oé-Cusse sub-rejiaun haat Oésilo, Pássabe Nítibe no Pante Makasar, ne’ebé idak-idak sei mobiliza komunidade atu partisipa,” informa Martinho Abani, iha enkontru preparasaun ne’e.

Durante iha sorumutu ne’e, entidade relevante sira deskuti asuntu prinisipál tolu, primeiru kona-bá selebrasaun loron proklamasaun 28 novembru, tomada pose ba konsellu suku no kondekorasaun medalla ba kombatente 182 iha Oé-Cusse.

“Tuir loloos serimónia tomada pose ba Konsellu Suku sira, konsentra hotu iha sub-rejiaun Pante Makasar, maibé tanba despaisu aprova ona hosi Primeiru Ministru, ne’ebé membru Governu sira sei destaka iha kada sub-rejiaun hodi testamuña serimónia simu pose ne’e,”  nia afirma.

Nune’e, nia husu ba Konsellu Suku sesante no eleitu, persiza koopera, mobiliza komunidade hodi partisipa iha loron nasionál ne’e.

“Ne’ebé misa ba loron proklamasaun ne’e ita sei hala’o iha 27, aban 28 novembru seremónia isár bandera remata, kontinua kedan ba tomada pose Konsellu Suku sira,” nia tenik.

Notísia relevante: MAE atualiza ba Horta kona-ba preparativu selebrasaun 28 Novembru no posse Xefe Suku

Iha biban ne’e deskusaun ne’e, jestór sub-rejiaun Pássabe, Antón Ulan, sujere ba komisaun organizadóra, atu aloka orsamentu ba komemorasaun nian, antes nune’e iha suku bele prepara.

“Ha’u sujere, sei bele atu aloka osan ba komemorasaun ne’e labele tarde, di’akliu aloka antes iha 24 to’o 25 novembru, nune’e iha amia mi bele prepara, buka transporte atu tula komunidade, hola bee ba komunidade, tanba tomada de pose sei hala’o iha kada sub-rejiau, partisipasaun komunidade sei barak,” nia husu.

Kona-bá orsamentu ba selebrasaun loron proklamsaun 28 novembru no seremónia pose ba Konsellu Suku, daudaun ne’e sei prosesu deskusaun iha Autoridade RAEOA.

Notísia relevante:Governu sei rekruta ofisiál na’in-tolu iha 2024 atu apoia administrasaun suku

Entretantu, hola parte iha enkontru preparasaun ne’e, komandante PNTL no F-FDTL, kargu xefia sira diretór no xefe departementu, jestór sub-rejiaun haat, no Konsellu Suku sira mai hosi suku 18 iha teritóriu Oé-Cusse.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!