BOBONARO, 23 novembru 2023 (TATOLI) – Koordenadór Bee Timor-Leste, Empreza Públika (BTL,EP) Munisípiu Bobonaro, Adriano da Cruz, husu ba komunidade sira iha Maliana liuliu sira-ne’ebé hela besik bee-matan atu utiliza bee-moos tuir nesesidade, tanba daudaun ne’e sistema gravitasaun Atugalai, Lugululi, Galusapulu, Beremau no Aikumu menus tebes kauza hosi bailoro naruk.
“Ita atu fó hatene ba kliente sira, ba populasaun tomak katak, hotu-hotu hatene informasaun kona-bá mudansa klimátika sei akontese bailoro naruk, ne’ebé hotu-hotu tenke uza bee ho kuidadu, poupa, uza ba nesesidade importante ita bele uza, maibé ko’alia kona-bá konteúdu uza bee-moos ne’e ita uza ba haan hemu, ita labele uza ba rega-rai, tanba ne’e ita uza ba nesesidade to’o ona, nakonu tiha taka ona, atu ema seluk bele uza fali,” nia informa ba jornalista sira, iha kna’ar-fatin Soso, Maliana, kinta ne’e.
BTL sei halo jestaun liuhosi sistema bomba ezistente lokaliza iha eis edifísiu BTL área Mamarunan ne’ebé rekursu bee mai hosi mota Bulobu atu suporta bee ba tanki rezervatóriu Santa Cruz no pemancar hodi halo distribuisaun ba konsumidór sira iha suku Lahomea, Holsa no Odomau.
Kona-bá zona 4 suku Ritabou no Raifun ne’ebé foin lalais ne’e bee la sai, iha loron-kuarta, 22 novembru ne’e ekipa tékniku sira halo ona manutensaun ba sistema gravitasaun Lugululi, nune’e hahú ohin ba oin distribuisaun normál fila-fali tuir oráriu ne’ebé iha.
“Ita sei labele tuir komunidade nia hakarak, dehan oras ida rua loke bee mai, tanba bee ne’e ita akumula ka tau hamutuk iha tanki rezervatóriu ne’e lori oras, lori tempu naruk, kleur, maibé kuandu distribuisaun ne’e lato’o oras ida dalaruma tanki mamuk ona, tanba ema balu nia atitude, hakarak husik loke be sai estraga, fura, uza bomba elétrika hasai, entaun balu hela iha ninin la hetan bee,” nia hateten.
Enkuantu daudaun ne’e BTL ho parseiru balu implementa hela projetu Water Tristement Pomp (WTP), ne’ebé rekursu bee sei foti hosi kanu-matan antiga parte Bulobu.
Daudaun ne’e BTL,EP sei implementa hela projetu Water Tristement Pump (WTP) iha área Lesupun, suku Lahomea, hodi garante distribuisaun bee kliente sira.
Sistema ne’e kapta direita bee hosi mota Bulobu ulun ho volume litru 25 pur segundu hodi apoia dsitribuisaun ba tanki rezervatóriu iha Santa Cruz no pemancar suku Lahomea, hafoin distribui ba konsumidór sira iha kapitál Maliana.
Objetivu hosi estabelesimentu sistema bomba refere atu apoia sistema gravitasaun bee-moos urbana hanesan Beremau, Galisapulu, Aikumu, Lugululi no Atugalai bainhira akontese bee menus iha tempu bailoro naruk.
Notísia relevante: BTL, E.P inisia fornese bee-moos ba komunidade Bobonaro no Covalima
Jornalista: Sérgio da Cruz
Editór: Evaristo Soares Martins
