iklan

INKLUZAUN SOSIÁL, POLÍTIKA

ADTL-Governu diskute área temátiku lima ba Ema ho Defisiénsia sira

ADTL-Governu diskute área temátiku lima ba Ema ho Defisiénsia sira

Diretór Ezekutivu ADTL, Cesário da Silva. Imajen Tatoli/Egas Cristovão.

DILI, 24 novembru 2023 (TATOLI)—Asosiasaun Defisiénsia Timor-Leste (ADTL) hamutuk ho Governu inklui parseiru sira halo diskusaun ba temátiku lima importante ba sosiedade Timor-Leste (TL) liuliu be Ema ho Defisiénsia (EhD) sira.

Notísia Relevante: DNEIASE prevee $95.729 atu implementa programa lima

Iha Semináriu Nasionál Promosaun no Protesaun Direitu ba Ema ho Defisiénsia iha Timor-Leste ne’e, Diretór Ezekutivu ADTL Cesário da Silva, hateten diskusaun iha semináriu nasionál kona-ba promosaun no protesaun ba ema ho defisiénsia, ne’e sai ema hotu nia esperansa planeamentu ba moris di’ak, sosiedade Timor-Leste nian.

“Asuntu inkluzaun defisiénsia ne’e importante ba ema ho defisiénsia, nune’e orsida fila hosi ne’e, ita ida-ida sura ita-nia aan ba inkluzaun defisiénsia Timor-Leste nian. Ita hotu prontu no sura ho ita-nia aan hodi kontribui ba dezenvolvimentu inkluzivu iha Timor-Leste,” Diretór ADTL ne’e hateten iha abertura ba semináriu nasionál kona-ba promosaun no protesaun ba direitu ema ho defisiénsia, sura ho ha’u-nia asaun ba protesaun ema ho defisiénsia iha sosiedade, iha Hotel Ramelau, Aimutin, sesta ne’e.

Iha diskusaun temátiku lima importante liu mak dahuluk, edukasaun tanba edukasaun mak sai xave hodi kore aan hosi moris ki’ak no atu dezenvolvimentu rai ida-ne’e presiza edukasaun.

Daruak, formasaun ba empregu depois presiza iha asesibilidade ba ema ho kondisaun defisiénsia, liuliu asesibilidade fiziku ba ema hotu-hotu no kona-ba direitu umanu, ne’ebé asegura direitu ema ho defisiénsia nian no asuntu saúde mental.

Diretór Nasionál Promosaun Direitu ba Ema Defisiénsia (DNPDED), Mateus da Silva, haktuir katak atu promove no proteje ema ho defisiénsia ne’e papel Governu nian no bazea Konstituisaun iha artigu 115, alinea b.

“Governu tenke asegura direitu ema ho defisiénsia, nune’e Governu tenke hatudu ninia seriedade ba implementasaun ba asuntu polítika inkluzaun dezenvolvimentu nasionál ba ema hotu-hotu inklui ema ho kondisaun espesiál sira,” nia hateten.

Asesór Prinsipál Gabinete Vise Ministru Infraestrutura, Alberto de Araújo, esplika infraestrutura bázika sai pilár importante ba sidadaun hotu-hotu inklui ema ho kondisaun defisiénsia iha dezenvolvimentu nasionál.

“Pilar importante ba dezenvolvimentu nasionál ne’ebé liga ho programa Governu nian katak kria kondisaun ne’ebé permite ba sidadaun ema ho defisiénsia nune’e bele hetan asesu ba infraestrutura bázika tuir ita ida-idak nia kondisaun,” nia dehan.

Diretór Jerál Sekretáriu Estadu Formasaun Profesionál no Empregu (SEFOPE), Paulo Alves, hateten SEFOPE nafatin tau konsiderasaun ba asuntu ema ho defisiénsia iha Timor-Leste.

“SEFOPE nia formasaun empregu ba maluk protadora defisiénsia sira mesak prioridade ba ita, tanba ema ho defisiénsia mós iha direitu ba asesu saida de’it. Nune’e SEFOPE nia kompromisu iha área Profesionál empregu mak sidadaun hotu-hotu iha direitu hanesan,” Paulo Alves hateten.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!