Kampaña loron 16, investe iha família hodi prevene violénsia hasoru feto-labarik feto

OÉ-CUSSE, 24 novembru 2023 (TATOLI) – Sekretaria Estadu ba Igualdade (SEI), hamutuk ho Prezidente Autoridade RAEOA, Arsénio Paixão Bano, sesta ne’e abertura kampaña loron 16, kona-bá ativizmu kontra violénsia hasoru feto no labarik feto, ho tema ‘hamutuk investe, iha família hodi prevene violénsia hasoru feto no labarik-feto.

Sekretária Estadu ba Igualdade, Elvina Sousa Carvalho, hateten, kampaña loron 16 iha Oé-Cusse sei hahú hosi loron 25 novembru to’o 10 dezembru 2023, SEI ho parsériu sira sei hala’o atividade hasa’e konsiénsia komunidade nian kona-bá lei no polítika.

Ho objetivu atu prevene, kombate violénsia hasoru feto no labarik-feto, oinsá halo relasaun ne’ebé saudável iha família, komunidade no iha fatin servisu no eskola sira, tanba violénsia hasoru feto no labarik-feto, grupu vulnerável sira seluk hanesan violasaun direitu fundamentál ema nian.

“Iha Konstituisaun RDTL asegura igualdade no labele halo diskriminasaun ba ema ida tantu iha vida família, polítika, sosiál, ekonomia no kulturál, maske nune’e, mensajen ida-ne’e, tenke repete beibeik, tanba tuir dadus inkéritu demográfiku saúde nian iha tinan 2016, iha Timor-Leste, feto na’in-ida hosi na’in-tolu sai vítima ba violénsia doméstika, no violénsia fizíku oinoin iha sira-nia moris tomak. Violénsia bazea jéneru reprezenta kategória  krime aas-liu, ne’ebé relata no investiga hosi PNTL,” Elvina Sousa, ko’alia liuhosi nia iha Otél Ambeno Oé-Cusse.

Notísia relevante: Feto nu’udar edukadora, inspiradora no jestora

Nia informa, Timor-Leste adota ona Lei Kontra Violénsia Doméstika (LKVD), durante tinan 13 nia laran, iha tinan 2010, lei ida-ne’e estabelese rejime jurídiku hodi prevene, proteje no fó asisténsia ba sobrevivente hosi violénsia doméstika atu asesu ba justisa no servisu esensiál sira seluk.

Tuir nia, iha tinan kotuk, Governu adota ona Planu Asaun Nasionál Kontra Violénsia Bazea ba Jéneru ba datoluk, ne’ebé ho durasaun tinan 10, hahú hosi 2022 to’o 2032 PAN-VBJ.

“Ida-ne’e, atu asegura entidade relevante sira atu foti medida nesesáriu hodi implementa kompromisu ida-ne’e inklui investe ba família,” nia afirma.

Prezidente Autoridade RAEOA, Arsénio Paixào Bano, agradese ba Governu Sentrál liuhosi SEI, tanba hili Oé-Cusse hodi realiza kampañia loron 16,  nune’e bele enkoraja povu Oé-Cusse atu kontribui Kontra Violénsia hasoru feto.

“Iha Oé-Cusse hahú mudansa, tanba konsiénsia ne’e hahú sa’e maka’as tanba feto iha suku no aldeia sira berani, hato’o keixa ona bainhira hetan baku, ita agradese mós ba servisu rede feto sira hotu iha sosiedade sivíl liuliu PNTL unidade vulneravél protesaun, ne’ebé maka la kolen, sira halo servisu maka’as ba prevensaun violénsia ba feto no labarik-feto,” nia katak.

Notísia relevante: Rede Feto preokupa IX Governu esklui “Bolsa da Mãe Jerasaun Foun”

Entretantu, hola parte iha iha kampañia loron 16 ne’e, mai hosi rede feto sira iha Oé-Cusse, grupu feto vulnerável mai hosi suku 18, grupu juventude, autoridade lokál, PNTL no F-FDTL inklui parsériu nasionál no internasionál sira.

Jornalista: Abílio Elo Nini

Editór: Evaristo Soares Martins