Feto nu’udar edukadora, inspiradora no jestora
DILI, 03 novembru 2023 (TATOLI) – Konstituisaun Repúblika Demokrátika Timor-Leste (RDTL) konsagra iha artigu 17 (Igualdade ba feto no mane) katak, feto no mane iha direitu no obrigasaun hanesan iha moris família, kulturál, sosiál, ekonómiku.
Nune’e atu promove igualdade entre feto no mane, Timor-Leste liuhusi Parlamentu nasionál, liuhusi Lei Númeru 17/1/3/2005, define loron 3 Novembru nu’udar loron nasionál ba feto. Nune’e mós, define no ofisializa loron ida ne’e nu’udar loron feriadu nasionál.
Tanba ne’e, Prezidente Konsellu Rede Feto Timor-Leste, Zelia Fernandes, elojia Estadu no Governu tanba bele konsidera loron ida ne’e sai feriadu nasionál, nu’udar fó rekoñesimentu ba feto nia partisipasaun iha aspetu hotu-hotu – polítika, sosiál-ekonomia no kulturál.
“Feto nu’udar eroina ba rai ida ne’e. Feto mós nu’udar edukadora, inspiradora no jestora iha uma-laran. Tanba ne’e Estadu fó rekoñesimentu loron ida ohin ne’e. Parabéns ba feto Timor-Leste no kontinua empodera aan,” Zelia kongratula feto hotu, iha ámbitu komemorasaun loron nasionál feto 2023 ho tema ‘‘Feto prontu lidera, uluk, agora no futuru, ba Agência Tatoli.
Notísia relevante:Feto tenke brani foti desizaun
Maske nune’e, tuir nia, feto kontinua hetan dezafiu ho problema kompleksa ne’ebé mak interligadu: iha área saúde hanesan mortalidade inan no labarik, númeru analfabetu, má-nutrisaun. “Sai númeru ki’ak multidimensionál ne’ebé ita hasoru”.
“Feto tenke iha saúde di’ak, iha nutrisaun, atu fó jerasaun saudável no sustentável ba Estadu Timor-Leste iha futuru,” nia reforsa.
Iha biban ida ne’e mós, Prezidente Konsellu Rede Feto Timor-Leste, Zelia Fernandes, husu feto no foinsa’e feto-sira atu kontinua kapasita aan atu bele fó kontribuisaun ba iha dezenvolvimentu nasionál no hamutuk ho mane sira hodi evita violénsia hasoru feto.
Notísia relevante:FOKUPERS rejista vítima violénsia bazeia ba jéneru-fiziku kuaze na’in-800
Jornalista: Jesuína Xavier
Editór: Rafael Ximenes de A. Belo
