Komunidade Holsa la asesu foos lokál ne’ebé CLN fa’an
BOBONARO, 24 novembru 2023 (TATOLI) – Komunidade suku Holsa, postu administrativu Maliana, munisípiu Bobonaro, durante ne’e la asesu foos lokál ne’ebé Sentru Lojístika Nasionál (CLN, sigla portugués) fa’an ho presu normál iha loron 14 fulan-outubru ne’e.
Foos ne’ebé fa’an ne’e hamutuk tonelada 50 ho totál saka 2,000. Enkuantu foos hirak-ne’e fa’an ba komunidade iha postu administrativu Atabae, Balibo, Cailaco, Lolotoe no suku balu iha Maliana.
Portantu foos ne’ebé CLN fa’an ne’e ho kolograma 25 ho presu $12 no kilograma 35 ho presu $15.
Notísia relevante: CLN sei fa’an foos saka 2,000 iha Bobonaro ho presu normál
“Ami proukupa oituan, liafuan intervensaun hosi Governu, ami hatene, maibé realidade iha ha’u-nia suku, foos ne’e sira fa’an iha-ne’ebé, ami iha komunidade ne’ebé vulnerável duni, presiza intervensaun hosi governu oinsa komunidade bele asesu ho pressu baratu ne’ebé komunidade foos, até a data ha’u-nia komunidade la asesu, tanba ami la hatene nia prezensa fa’an foos ne’e iha oituan ne’ebé,” Xefe suku Holsa, António Santa Cruz, ko’alia iha Maliana, sesta ne’e.
Nu’udar autoridade lokál kestiona ssuntu ne’e, tanba hakarak hatene programa ne’ebé governu halo ba komunidade ne’e la’o tuir regra ne’ebé hasai ka lae no povu sente duni ka lae.
Liga ho problema ne’e Santa Cruz, afirma governu liuhosi CLN presiza halo koordenasaun ho autoridade lokál sira nune’e komunidade sira bele sente duni governu halo intervensaun ba folin foos iha baze.
“keta halo ita-nia ema halo manipulasaun, tuir fali sira-nia hakarak, tanba ne’e ami hakarak hatene, oinsa ami bele kontrola. Ema-ne’ebé fa’an governu nian foos, ami hanesan lideransa komunitária ne’e la’ós hateten dehan ami mak tenke fa’an, lae ka prosesu tenke liuhosi suku sira, lae, maibé pelumenus loron mai ne’e tenke iha koñesimentu,” nia fó hanoin.
Koordenadór Armazein CLN Maliana, Domingos López, rekoñese foos ne’e la konsege fa’an duni ba komunidade Suku Holsa, tanba intervensaun ba postu administrativu lima seluk no suku rua iha postu Maliana de’it ho razaun estoke la sufisiente.
“Foos ida primeira faze ne’e iha postu Maliana ami fa’an ba suku Tapo-Memo no komunidade suku Saburai balu, la’ós dehan suku Holsa la hetan, maibé sei iha segunda faze atu responde fali suku Holsa no suku sira seidauk hetan ne’e. Ami ba fa’an iha sede suku, maibé ami sei liga ho autoridade lokál sira atu konvida ninia komunidade sira,” nia katak.
Enkuantu CLN foti asaun refere bazea ba orientasaun hosi IX Governu hodi halo intervensaun ba presu foos ne’ebé kuaze sa’e iha merkadu territóriu nasionál.
Notísia relevante: CLN sei sosa hare-kulit tonelada 1.111 iha tinan ne’e
Jornalista: Sérgio da Cruz
Editór: Evaristo Soares Martins
