RAEOA okupa fatin datoluk ba violasaun seksuál ho pursentu 11
OÉ-CUSSE, 24 novembru 2023 (TATOLI) – Sekretária Estadu ba Igualdade (SEI), Elvina Sousa Carvalho, informa, bazea relatóriu implementasaun Planu Asaun Nasionál (PAN) 2021 rejista ona kazu Violénsia Bazeia Jéneru (VBJ) hamutuk 1.359 no violénsia doméstika 1.120.
“Kona-bá kazu violasaun seksuál hamutuk 239 ka 11% maka akontese iha Oé-Cusse no okupa fatin datoluk aas-liu iha tinan tolu tuituir malu, ikus ne’e iha Timor-Leste hafoin Díli no Liquiçá,” Elvina Sousa Carvalho, ko’alia iha ámbitu kampaña loron 16 iha Otél Ambeno Oé-Cusse, sesta ne’e.
“Tan ne’e, maka SEI hili Oé-Cusse, hodi lansa kampañia loron 16 ativizmu kontra violénsia hasoru feto no labarik-feto iha tinan ida-ne’e, dala ida-tán, ha’u repete, violénsia hasoru feto no labrik-feto iha kustu boot ba dezenvolvimentu ema-nia moris iha vida sosiál no ekonómia rai ida-nian,” nia katak.
Notísia relevante: Kampaña loron 16, investe iha família hodi prevene violénsia hasoru feto-labarik feto
Nia dehan, violénsia doméstika estraga relasaun família, no fó impaktu ba saúde mentál no fíziku ema nian, la’ós de’it ba ema ida maibé ba membru família hotu. Labarik sira-ne’ebé esperiénsia violénsia no abandona hosi família bele hetan problema iha dezenvolvimentu sira-nia aan iha sira-nia moris tomak.
Tuir nia, estudu barak hatudu katak, krime ka violénsia hasoru feto no labarik-feto barak akontese tanba edukasaun ba oan mane-sira, ne’ebé maka sala ka ladún loos, kona-bá oinsá atu kria relasaun ne’ebé maka amigável, iha respeitu ba malu no saudável.
“Dala barak, diskriminasaun hasoru feto no labarik-feto hahu hosi uma laran, nune’e provoka violénsia, nune’e ita hotu ne’ebé ohin hamutuk iha fatin ne’e, kontinua ho firme atu tau esforsu hamutuk hodi investe ba iha família, hodi prevene no kombate violénsia hasoru feto no labarik-feto.”
Prezidente Autoridade RAEOA, Arsénio Paixão Bano, agradese tanba sistema justisa iha Timor-Leste, ba violénsia feto nia atendimentu lais, kuandu halo violénsia hasoru feto ida.
“Maibé buat ida mak ita tenke halo atu hasa’e konsiénsia populasaun sira, mak ne’e, kuandu mane ida baku feto ida, iha o nia sorin, lalika nonok, ne’e la’os problema nia uma laran, maibé ne’e reponsabilidade koletiva, kuandu nonok, entaun ita mós kontribui ba violénsia hasoru feto, entaun tenke halo keixa, katak violénsia hasoru feto ne’e krime públiku,” nia dehan.
Notísia relevante: ALFeLa rejista violénsia hasoru feto no labarik 32 iha RAEOA
Jornalista: Abílio Elo Nini
Editór: Evaristo Soares Martins
