ALFeLa rejista violénsia hasoru feto no labarik 32 iha RAEOA
OÉ-CUSSE, 19 outubru 2023 (TATOLI – Iha fulan maiu to’o setembru 2023 ne’e, Asisténsia Legál ba Feto no Labarik (ALFeLa) rejista kazu kona-bá violénsia hasoru feto labarik hamutuk na’in-32 iha Rejiaun Administrativa Espesiál Oé-Cusse Ambeno (RAEOA).
“Hahú iha maiu to’o setembru ne’e, ALFeLa fornese ona asisténsia ba iha vítima sira hamutuk 32, dadús sei seidauk inklui kazu tuan sira,” Diretora ALFeLa, Marcelina Amaral, fó sai iha Oé-Cusse, kuarta ne’e.
Ezekutiva ne’e esplika, kazu sira-ne’e, nia kauza maioria mai hosi violénsia doméstika, no kauza hosi violénsia doméstika tanba, komunidade balun seidauk iha koñesimentu tanba baibain akontese ne’e iha família uma-laran akontese iha feen no laen maibé, sira konsidera hanesan baibain.
Maibé tuir lei, ida-ne’e la’ós normál, ne’e krime. Entaun, lei kriminaliza. Kauza seluk mós hosi kazu sira seluk hanesan, moris vulneravél, no dependénsia ekonomia ba mane no mós kazu adulteru.
“Entaun situasaun ida-ne’e, ita-bele haree katak kazu aas iha RAEOA, tan ne’e maka ami mai hasoru Prezidente Autoridade RAEOA atu-bele, Alfela hatután servisu Governu nian, ba iha protesaun no prevensaun hodi responde ba iha vítima violénsia bazea ba jéneru sira,” Marcelina Amaral akresenta.
Tuir nia, kliénte sira-ne’ebé ALFeLa, presta asisténsia ne’e, maioria feto no labarik sira, maibé dadús ne’ebé rejista iha ALFeLa nia sistema, feto idade 18 ba leten maka barakliu kompara ho vítima labarik.
“Vítima labarik ne’e kuaze mai hosi kazu abuzu seksuál ba labarik, inklui mós kazu abandona menór, ida-ne’e maka rejista iha sistema, tanba ALFeLa nia misaun ne’e, fornese de’it ba iha vítima feto ho labarik sira,” nia informa.
Tan ne’e, Prezidente Autoridade RAEOA, Arsénio Paixão Bano, promete RAEOA sei kontinua extende selebrasaun akordu ho parseriu organizasaun sosiedade sívil sira, nune’e bele apoia Autoridade RAEOA kona-bá asisténsia ba kazu violénsia doméstika sira, akontese iha Oé-Cusse.
“Agora iha prosesu orsamentasaun ba Orsamentu Jerál Estadu 2024 nian, ne’e ita sei haree saida mak atu ajuda, tanba RAEOA konsidera ALFeLa hanesan parseriu ida, sira mós servisu ho independente, mezmu apoia ne’e mai hosi fundu transferénsia hosi RAEOA nian, maibé servisu ne’e independente, ami só hakarak hatene katak, servisu bele la’o, vítima sira bele hetan asisténsia legál bele ajuda mós setór justisa,” nia promete.
Notísia relevante:ALFeLa rejista kazu foun 223 iha janeiru-maiu
Entretantu, antes ne’e Autoridade RAEOA selebra kontratu ho grupu organizasaun sosiedade sivíl ualu (8), liuhosi subvensaun públika ba siklu dahuluk ho montante rihun $240,322.69, atu apoia Autoridade RAEOA hodi tau matan ba problema sosiál sira, ne’ebé akontese iha Oé-Cusse Ambeno.
Grupu ualu ne’e maka hanesan, Asosiasaun Feto Mudánsa Ekonomia Família, (AFMEF), Uma Pas Oé-Cusse (UPO), ALFeLa, PRADET TL, Justice System Monitoring Programme (JSMP), Asosiasaun Halibur Defisiénsia Matan Timor-Leste (AHDMTL), Fundasaun Sosiál Naroman (FUSONA) no Juventude Hadomi Oé-Cusse (JHO).
Jornalista: Abílio Elo Nini
Editór: Rafael Ximenes de A. Belo
