DILI, 28 juñu 2028 (TATOLI)—Diretora Asisténsia Legál ba Feto no Labarik (ALFeLa), Marcelina Amaral, hateten ALFeLa rejista kazu hosi fulan-janeiru to’o maiu 2023 ne’e hamutuk 223 ne’ebé kompostu hosi mane hamutuk haat (4) no feto hamutuk 218.
Notísia Relevante: 2020-2021, ALFeLa rejista kazu violénsia hamutuk 1,185
“Hosi kazu ne’e, ita iha violénsia doméstika 139, violénsia seksuál 57, no krime seluk hanesan kazu sivil no mós kazu alimentasaun ba menór liuliu ligadu ho ezersísiu poder paternál no alimentasaun ba menór no abandonadu menor ne’e iha 17. Agora, entre kazu afeta ba feto 218 ne’e iha mós ba menór no feto idade maiór, maibé ba mane ne’e mesak idade kiik hotu,” nia dehan ba Agência Tatoli, iha nia kna’ar fatin, Vila Verde, kuarta ne’e.
Maibé, nia dehan, totál kazu hosi inísiu ALFeLa eziste to’o maiu 2023 hamutuk 6.171 ne’e, iha kazu ativa to’o maiu 1.624, kazu ne’ebé taka ona hosi inísiu to’o maiu 2023 hamutuk 4.322.
“Kazu sira-ne’ebé taka ka remata ona hosi inisiu to’o maiu tinan ne’e mak 4.322. Ida-ne’e signifika laiha ona maibé kazu ne’ebé ami taka ona hosi janeiru to’o mai iha maiu ne’e hamutuk 601,” nia dehan.
Nia hateten, kazu ativa sira-ne’e sei prosesa iha tribunál tanba haree ba rekursu limitadu entaun labele aselera kazu sira-ne’e.
“Kazu barak sei pendent, tanba ita haree ba rekursu ne’ebé iha katak la ekilibriu ho kazu nia kuantidade ne’ebé iha,” nia hateten.
Jornalista : Osória Marques
Editór : Cancio Ximenes
